فيمينيزم

ليوم قررت باش نمشي لللافايات، قهوة مستانس نركش فيها اسمها ليبرتاي(Liber'thé) .دخلت، كي العادة تصاور إيفانمونات على الباب ، كي العادة ما عنديش نفحة باش نحضر ماغير مانركز معاهم . أما ألي يعجبني فيها أمالي القهوة حاطين كواتروات ساعات مصورين بليد وساعات بلمصورة و فما زوز عرص مكتوب عليهم أسامي ناس مشهورة توسع بالك وتقراهم كي تبدا مكرز . حاجة جديدة تزادت مكتبة ورا الكونتوار خرجت حاجة عالمية .  

شديت كرسي وحلت البريز وجبدت بي دي أف (PDF) نقرا فيه ماغير ما نستعمل كيت ما فماش روتانا بش تزعجني هوني لموزيكا يا بينك فلويد يا لاد زابلين حاجات في الموجة هاذيكا ساعات يحط جاز ولا بلوز ، خسارة ما فماش معدن (ميتال) راني عايش غادي .

جاني أحمد : "عالسملامة" لكلمة هذي بطريقتو المعهودة معناها "آه نيك شتشرب" قتلو "فما شكون جايني تو نهبطو مع بعضنا" تبسم "على راحتك"  ومشى .  

******************** 

قعدت نقرا في كتاب شدني حتى نلقى زويز قلبوها بالضحك ، لحق ما وخرتهاش خدمت راداراتي وقعدت نسمع ، لحكاية على أبو نواس كيفاه كان عايش  

الراوي :" ههههههههه ، أبو نواس قحبون خرى في كيف الخليفة خرية منيكة  ههههههه   "

المنصط:"ههههههههه كيفاه ؟"

الراوي :"مرة هو وصاحبو راكشين ركبتلهم باش يسكرو ... يبرى هوما خارجين ويأذن العشاء"  

المنصط يتبع في الحكاية بشغف :"أي ؟ كمل "

الراوي:"صاحب أبو نواس هاج عليه ضميرو وقالو  هاك تشوف الناس ماشين يصليو ونحنا ماشين نسكرو سيب علينا . طلع شجاوبو أبو نواس ؟ "

المنصط :"شقال ؟ ههههههههه تكلم "

الراوي :"دع المساجد للــعباد تسكنها  وطف بنا حول خمار ليسقينا ما قال ربك ويل للذين سكرو   ولكن قال ويل للمـصلينا"

أنا واحد مالناس عجبتني الرشقة وزدت قعدت مركز معاهم , و هوما يتسككوو ضحك .

الراوي:"يعني تخيل هذا الساركازم ولا لوح ، هذا يتسمى ثورة على النظام وخريان في كيف الوالي هاي لقطة أخرى "

أنا شخت في مخي و المنصط كيف كيف يظهرلي .

الراوي:"مرة أبو نواس مروح بدبوزة شراب ، جاه الخليفة قالو شنوا هذا يا أبو نواس ؟ جاوبو أبو نواس لبن يا خليفة تلفت الخليفة يعملو تتقوحب ؟ لبن أحمر هههههه طلع شجاوبو صاحبنا ؟   "

المنصط وعينيه تشعل ومركزة في صاحبو :"شنوا ؟ نشالله خير"

الراوي:" أحمرت خجلا منك يا أمير المؤمنين"

المنصط : "هههههه معلم والله اخرالو فيه  "

أنا هكا نسمع في الحكاية بكل شغف ينوقز تليفوني ، جاني ميساج ، الطفلة إلي باش نقابلها جاية مخر خاطر الترونسبور. ضحكت ضحكة متاع ما فما شي جديد كي العادة ماناش في ألمانيا وعيط لأحمد "أحمد ديراكة قوية في كاس " أحمد لقى فيا باي "شنوا ما جاتش ؟ تلفتك يا ناري عليك  "ضحكت وجاوبتو "كي العادة شيكس أر اولوايز لايت " وعلى كلمتي زوز بنات في الطاولة إلي بجنبي خزرولي خزرة متاع كيفاه تحب تموت ؟ والطفل الي معاهم في الطاولة خزرلي وعملي ثامبز أب (thumbs up) وقالي ترو ستوري دود . تجي وحدة منهم تشحطو وتتشوكع "مينووووو ! يعطك قصة فاكا الصبع واللسان" ودورلي "أحنا ماو اولوايز لايت ستنا نشدك تو نوريك" ضحكت ضحكة صفراء باش نتلف همي الوحيد نرجع أنسنس على أبو نواس ومغامراتو .

لمرة هاذي جبد التليفون وقعد يقرا في لحكاية ملتاليفوون

بينما كان أمير المؤمنين هارون الرشيد في مجلسه وعن يمينه ويساره الوزراء والعظماء من أهل مملكته وأصحاب الرأي عنده. دخل عليه حاجبه معلنا قدوم أبي نواس , فقال الخليفة  دعه ينتظر قليلا. ثم نظر الى جاسائه وقال  هذه فرصة سانحة نضحك فيها على أبي نواس ويجب أن أستحضر لكل منكم بيضة تخبوئنها في طيات ثيابكم حتى أذا دخل أبو نواس , يتكلم كل واحد منكم بكلام فيتكلم أحدكم كلمة أغضب عليكم عند سماعها , وأقول  يا لكم من ضعاف مثل الفراخ. تالله أذا لم تفعلوا مثل الدجاج ويبيض كل منكم بيضة لاقطعن رقابكم . فقالوا  سمعا وطاعة يا أمير المؤمنين. وعندئذ طلب الخليفة الحاجب وقال له  اذهب فاستحضر ست بيضات , ولا تدع أحدا يراك , خصوصا أبو نواس , فخرج الحاجب . وعاد منفذا أمر الخليفة وأعطى لكل من الجالسين بيضة, خبأها بين طيات ثيابه , وجلسوا ينتظرون . ودخل أبو نواس فسلم على أمير المؤمنين سلام الخلافة , وأظهر الرشيد انتباهه الى حديث جلسائه , ونطق أحدهم بكلمة . فغضب منها الرشيد غضبا شديدا فصاح بهم  ويحكم أيها الجبناء أنكم مثل الدجاج , ولاأجد فرقا بينكم وبينهم والله ان لم يبيض كل منكم بيضة لاقطعن رقابكم. فأظهروا الاضطراب والخوف , وأخذوا يفعلون كما تفعل الفراخ . وبعد قليل مذ الاول منهم يده الى مؤخرته, فأخرج بيضة وقال هاهي بيضتي ياأمير المؤمنين وأعقبه الثاني والثالث الى السادس , وكان الخليفة يقول لكل من يقدم بيضه  قد نجوت. ولما جاء دور أبو نواس وقف على قدميه ومشى حتى توسط الجميع , وصار أمام الخليفة وجها لوجه , ثم صار يقول كاك , كاك, كاك . كما يفعل الديك بين زوجاته الدجاج , ثم ضرب ابطيه على بعضهما , وصاح بأعلى صوته كما يفعل الديك تماما , وقال كوكو , كو. فقال الخليفة ما هذا يا أبو نواس . فقال أبو نواس  عجبا يا أمير المؤمنين , هل رأيت دجاجا تبيض من غير ديك هؤلاء فراخك وانا ديكهم. فضحك الخليفة حتى كاد يسقط عن كرسيه , وقال له  يالك من خبيث ماكر, تالله لولم تكن فعلت ذلك لعاقبتك  ثم امر له بهدية ومال معجبا بذكائه .

رجعت نقرا شوية في الكتاب أحسن حاجة باش نضيع بيها الوقت وساعات يجي واحد نعرفو نسلم عليه ولا يقعد بحذايا نتونس بيه . "وينك يا هراب" ، "هل غيبة" ، "يا ساقط ما تسألك" ... مااحلاه الشعور تحس بروحك محبوب من عند الناس وكي يشوفوك يفرحو بيك ... وكيما يقولو ناس بكري برا يعطيك القبول و محبة الرسول .

مازلت كل أنثى تدخل ، عينيا تترشق في الباب تتطلعشي هيا ؟ و منحبش نكلمها الطفلة مشيش تقول راني ملهوف ولا حاجة مشابهة . البارح صارت مشكلة ديجا ، هي فيمينسة للنخاع وأنا عندي فلسفة مختلفة و وجهة نظر أخرى . تعاركنا على خاطر موضوع هكا وقتلي خنتقابلو ونفضوها . مادام ما عندي ما نعمل قلت خنشوف بحثها .

********************

زادت شوية و جات ، في قلبي نغني طلع البدر علينا . دخلت شعرها بوكلي (bouclés) مريات شمس مريول رولينج ستونز و فاست و ساك سخط في يدها وعاملا ظوافرها بلحمر .خزرت إيمين و إيسار، راتني نحات مرياتها وجاتني : "سالي(salut) مهدوش ، ديزولي عال روتارد ."كل ما نسمع مهدوش نحب نبدل أسمي ، من جيهة برشا إسمهم مهدي و زيد يا معلم ما فما كان مهدوش كتربيجة ؟ يلا فما مانك(manque) متاع تجديد .

جاوبتها بعد ما قمت خذيت بوستين "با دو سوسي (pas de soucis) ، تفضل أقعد "

على وظوك يا سي خليفة ، جا أحمد "عالسلامة " ، وقعد يخزرلي خزرة متاع تقوحيب بحتة .

جاوبتو :"يسلمك ، واحد مخيتو ".ومشى عجاجة .       

تلفتتلي وسألتني :"أي ، مستر سكسيسة ، شتعمل في حياتك ؟  "

جاوبتها : "ماستار علم نفس و صحافي فري لانسر ، و إنتي ؟  "

هي  :"لا لا ما نقصدش قراية ، تنشط في مجتمع مدني ؟ "

أنا بعد ما تفاجئت وقعدت نخمم خاطر في علاقاتي الإجتماعية اخر همنا الجمعيات : "همممممم موش حاجة كبيرة أيساك (AIESEC)  و جي سي ئي (JCI)عام أما أسو ماهمش متاعي ، بدلت القلم ".

هي : "خسارة ساعة ، هوما يعاونو برشا ، خاصة نهار أخر في حياتك تعمل بيهم ريزو كبير وتعر بلادنا قايمة على سياسة بعثني سي فلان ".

أنا نبدل في الموضوع : "لا لا يعيشك سا نا با مارشي (ça n'a pas marcher)، أكسبيريوونس(expérience) و مشات على روحها ، ما ناش بش نكونو لكل كيف كيف ".

هي :"أنا خذيت الماستار متاعي و بديت نحضر في الدكتوراه اختصاص حضارات ، ونخدم في جمعية نساء بلا حدود ، الجمعية هاذي خلاتني نقابل برشا نساء وعرفت برشا نساء يستحقو برشا حالات ورشا مساعدة   "

أنا تكبسة شوية على خاطر ما كنتش متوقع إنسانة هكى ، و تحمست على خاطر لازم نستفاد من عندها شوية وقلتلها :"ما  شاء الله عند سيفي مزيان حلو "

هي تلفتت تستفسر وفي نفس الوقت تحب تنحي السيريو (sérieux)   : " علاه تكره الفيمينيزم ، فاش قلقوك النساء مستر سيكسسيسة ؟ "

أنا مازلت نفصص فيهم :"على خاطر وانتوما جرتكم حرفا ، جرايركم كلا أدم التفاحة"

هي، فشلت : " يااااا أماكسح قلبك شادد البغض من وقتها لتوا ، يقوى عليك ربي هههههه    ".

أنا : "شفت ، شفت "

هي : "أي ، هاني نشوف ، كمل كمل سي الشباب "

أنا : "على خاطر طلعتو السيجارو جراير العناد متاعكم  "

هي مبهمة منين ليا بحكاية هكا :"ههههههه أي أي نعرفها الرجال يتكيفو بيبا(pipe) ياخي النساء طلعو الدخان عناد ، ههههههه حشوتين بلاش شفت ماقوانا تراه فماشى زيادة ؟"

أنا: "بالطبيعة ، حرب طروادة ، حرب الماغول ،زوز حروب تاريخية قامو على خاطر نسا . إلي حبت تحشيه لسيدنا يوسف ...  وأنتي شنوا خلاك تتعلق بأمور المرأة  "

هي: " هههههههه !باهي بيبي من منطلق ديني الإسلام عفس في المرأة . بمعنى محقها ، هاو كيفاه ما تخدمش ، ما تخالطش الرجال قوامون على النساء ، النساء ناقصات عقل ودين ميراث شطر ، تعرس صغيرة أنا عيشة هذي ؟ "

أنا حبيت نصلح وجهة نظر : "ما لايدي خنتفاهمو ، الإسلام ما قالش للمرى ما تخدمش ، ما قاللهاش ما تخرجش بحجة في عهد عمر بن الخطاب فما نساء دور في السوق و تخدم تنهى عن الفحشاء والمنكر ،الرجال قوامون على النساء همممممممم يمكن على خاطر الرجل عندو مقومات قيادية أقوى أما ما عندك ما تعمل هذه حاجة ربي . نجيو لحكاية الميراث ربي قال خلي وصية ، كان ما فماش وصية نتعداو للميراث ؟ متفاهمين ؟ "

هي و تتبسم بسخرية : "هههههه قتلي الرجال عندهم ليدرشيب أقوى ؟ "

أنا : "ماهيش نكتة ، ترو ستوري "

هي زادت ضحكت وقالت : "بيبي ، كليوباترا تبيع الكفتاجي ؟نيفرتيتى ، ماتيلدا ، عليسة،الكاهنة تبيع اللبلابى ؟وليستا طويلة ماعادش تقولها حتى بتفدليك أمان كليوباترا بركة مشات جيوش ما جيوش ."

حاولت نرجع ناخو بزمام الأمور شوية : "باهي صار فصل الدين على الدولة ، شنوا اخر يخليك دافع بشراسة على حقوق المرأة "

هي : "همممممم تالمون برشا لين نسيت ، تراه نحكيو في أمور إجتماعية ، تعنيف المرأة ، راجل يروح سكران يعطي طريحة لمرتو ، ولا مرا تقس على قرايتها وتمشي تهبط للعاصمة تخدم في الديار تولي فريسة ساهلة لمبتغى جنسي من عند راجل ؟ وإلا نحكيو على عزوزة تلوج على قوتها ... "

أنا : "نراهم قضايا إجتماعية و مشاكل إقتصادية بحتة ، موجودين كل يوم أما جمعيات النساء ما يحكيوش فيهم نراهم كان مكبشين في السفاسف هاو تحرش ، هاو تبذنيص هو رويق بارد. بصراحة قضايا ملنوع هذا نراهم قضايا إجتماعية ودور إنساني أكثر من إجتماعي ".

هي بدات دور معايا في دوامة فارغة : "أفهم ، نحنا نحكيو على بنية عمرها 13 سنة مازال ما عندهاش 9يام متاعها تخدم بونيشا في دار ونديدتها تمشي تقرا ... صف شعورك"

أنا نعاند : "نفس الحالة طفل يبيع كاكي ودخان 16 سنة قدام ليسي ... صف شعورك . القضية إجتماعية بحتة يعني لازم إحاطة من جميع النواحي والدولة تزيد تخدم في الجهات الداخلية وما تنساش الأولاد إلي يبيعو في النوار في سونتر فيل ."

هي حبت تحط طرف توازن في المناظرة وإلا تقلب الطرح : "النساء في تونس عندهم مشكلة أخرى ، ما فماش إصلاحية للبنات عادي وحدة تشد الحبس 15 سنة مع وحدة 51 سنة أفهم وحدك كيفاه تخرج يعني كان الأولاد عندهم إصلاحية هام تعلم نجارة وإلى حدادة ... البنات شعندهم ؟ "

قلتلها بإستهزاء : "انتوما وجمعياتكم لاهين كان في الاغتصاب والتحرش الجنسي هاو توا جبدنا طرف قضايا أخرين إنسانية ، إجتماعية مش مشكل أما لاهين كان في قضية وحدة الاغتصاب"

تلفتت هي وعينيها بدات دمع شوية : "ياخي جاتك شوية القضية هذي ؟ ياخي معندكش فكرة شقاعد يصير ؟ كان نقلك مخك ياقف ، هي شد عندك ، هاو لكلاش  حسب بلانت أو سكوب (planetoscope.com) نسب الاغتصاب في أمريكيا 95136 حالة سنويا فرنسا 8458 ألمانيا 8615 هذوما إلي مدكلارين عليهم ... يعني البلدان إلي تشوف فيهم مااحلاهم و قداشهم سيفيليزى تفرج ... تخيل نحنا قداش ؟ مازلنا ما خلطناش أقنعنا البنات تتكلم ، مازلنا ما خليناش البنات تاقف وتحكي باش نخلطو نحاربو الاغتصاب ... كانك تحكي على حرب مازلنا ما بديناهش أصلا ".

أنا بعد ما تصدمت : "ما تنجمش تربح حرب هكا الحكاية هاذي ما تاقفش . صحيح في تونس تنجم تاخذ حقها أما في بلدان أخرى في العالم العربي أنا واحد ملناس نحب سيستام يتبدل . "

تلفتت "حتى كان هكا فما 1000 مرى و مرى تستحقنا و باش تلقانا  "

أنا نحب نهدي الجو بعد الانفعال : "يا بنتي صلي على مولاك قلم مووخيتوو متاعك وبعد برا حرب "

هي : "ديزولى انفعلت أما والله القضية هذي عطيتها من عمري ، صحيح انتي متملح ومكش فاهم أما صدقني أنا هاني نهبط ونحكي مع بنات وما عندك حتى فكرة على شعور وحدة مغتصبة  ".

أنا تلفتت نوضح في معلومة : "أسمعني ، أنا مانيش مع الاغتصاب حتى طرف أنا راو مع العدل ... قداه من طفلة تجي تباصي طفل وتقلو نعرسو ولا نشكي ؟ قداه من طفلة تشكي بطفل مشات معاه بهواها لدارو وتقلو نعرسو ولا هاك في الحبس يا معلم فيق شوية عيش بنتي راهو القانون في تونس وقف مع النساء حتى لين ماعادش ... نزيدك زيادة المطلقة تاخو نص شهرية راجلها ولا الإكس متاعها يعني راجل 700 دينار شهريتو تقعدل 350 ... بمعنى ماعادش ينجم يعاود حياتو ... هل المرأة مظلومة في تونس ؟ "

قعدنا ندورو في حلقة فارغة ، الزوز حب الإنتصار والعناد خذانا وبعدنا على نقطة الانطلاق . صحيح مجتمعنا ذكوري بحت وما فما حد ينجم ينكر هذاكا بأمارة "راجل ما يعيبوشي" من جهة أخرى فما برشا نساء و بنات استغلو جانبهم الأنوثي باش يوصلو لمبتغاهم ومبعد تلقاهم هوما لولانين إلي يضربو على حقوق المرأة لغاية مادية ولا شهروية . نفس الشريحة هذه إلي تسخايل روحها فايقة أما هي حمقاء تفيق بيها في أصغر لقطات مثال تحب شكون يحللها باب الكرهبة ، تحب الطفل يكمندي بعدها ونختم بسركازم تعمل قهوتها في الطولات "تمشي تحلق مع صاحبتها في الطولات حتى كي يبداو وحدهم خرجو زوز بركة "            

كملنا حديثنا تلفتت "أنا ماشية لأريانة وأنتي كيفاه باش تعمل ؟"

قعدت شوية نخمم "همممممم باش نمشي نقابل صاحبي "

لبست مرياتها سلمت عليا وقتلي "خلينا نشوفك مستر سكسيسة "

ضحكت وقلتلها "نشالله ، بيناتنا التل ولا عركة على الفايسبوك "مااحلاهم العباد هكا شي ايز سمارت . بعد تعدى أحمد يخزر ويضحك ويعمل أي أي جوك باهي حالة معاك . جبدت  التليفون كلمت حسام نشوف فيه وين ، لميت دبشي وخلط عليه .  

 

previous> 

<next