البروفة

   بريفيوسلي أون حكايات قهاوي ... أنزل كان نسيت  

وات تايم إيز أيت ؟ بروفا تايم ... مل بارح وأنا فايق اكسيتى ليا فوق العام ما لعبتش مع جماعة موزيكا دونك ما عنديش موتيفاسيون قوية باش نخدم و نركش فوق مل 6 سوايع مع باص .عام كامل عديتو نلعب كان كي يبدا القلق عاطي مسد  .

خرجت بكري شوية حضرت جوي وقعدت نكركر في أكا لامبلى .   أنا نسكر في باب الدار عرضني عم سالم التكسيسة : "شنوا ... راغب علامة باش توليلنا ؟ تسمعنا حويجة توا  "  

ضحكت و سليتها بضحكة : "أنا عازف نلعب بيديا موش بفمي عم سالم و كان سهل ربي نفوت راغب علامة ههههه " .

عم سالم محرك الحومة كيما عندنا الباجي عاش على مر التاريخ عم سالم جا مع المروج . يعرف كل شي على الحومة الشقيقة والدقيقة . ضحك وقالي : "عيش ولدي لعند ربي ماهو بعيد ! سلم على بوك ".

وأنا نمشي وقفني واحد في 40 أكاكا : "عالسلامة معلم أسمعني أنا عندي جماعة نلوج على واحد يلعب جيتار تجي ؟ "

ضحكت و في قلبي : "يعطك عصبة أنا بعد عزي و ميتالي نطيح لأم لعوينة الزرقة ... إمبووستاحيل"    .

الزح الشياح الثقافي إلي صار رد العباد هكا ، واحد شادد أي حاجة في يدو غير الخبز حاجة غريبة ، تبدا تمشي مرتاح يجيك واحد ما يفهم شي يا أما يلعبها سيد العارفين ولا يحب ينبر ... يا ولا حل و برا  .نقعد ديما نقول المشاكل إلي عندنا مناش راضين بحالتنا و مانحبوش نصلحو من رواحنا ... يعني مثال كان تقول راك ما تعرش حاجة موش عيب ، حتى كان حسسك إلي أنتي بهيم راو بعد درج بش تكون تعرف حاجة جديدة والعقلية هاذي قليل من يعرفها .    

وصلت وين كلمني صاحبي نلقاه ديجا يستنى فيا بكرهبة 106زرقاء هو و طفل اخر . سلمت عليه : "أهلا طارق ، شحالك ؟ "

تلفت هو حل فلست الكرهبة و قالي : "باترون ، هيا أطلع " و زاد تفدليكه ، أنا حسبتها عادية أما فما شكون يقراها تطيش معنا : "راك مخر شوية الباسيست يلزمو ديما في الوقت "دخلت بعضي شوية و ما لقيت ما نجاوب مبعد قالي : "نقدملك حيدر الطبال متاعنا باش نمزكو حذاه  "

حيدر كيما أي واحد يلعب درامز تحسو إنسان شانع و صاحب جو ثنية كاملة وهو يدربك على الكرهبة و سعات كي تتعدى طفلة يا يتبولد عليها يا يشحطها   من ترمتها . حاجة كيما هكا لا نحب لا عندي جرأة باش نعملها و حتى كان بش نكلمو ماهوش بش يقتنع وعادي يقلب لمشامية عليا ... لحاسيلو وصلنا لدارو نلقاو طفل وطفلة غادي قدمهملى طارق : "ليندا مغنية المجموعة و غاستون     (gaston) سانتي ، يا جماعة مهدي الباسيسة الجديد "

جات ليندا سلمت عليا و قتلى : "أهلا مهدوش مرحبا بيك "عطاتني بوستين و كي العادة كل ما نسمع مهدوش نتمنى نبدل أسمي . مشيت ركشة بحذا حيدر ركحت ماتريالى ومبعد قعدت نخنتب وحدي نسخن في صوابعى نلقى طارق يلعب في أكوورات متاع غناية لعبة عليها قبل أما ما نتفكرش اسمها ، قعدت نحاول نربط لخيوط نحسها حكاية موش غريبة عليا نحبها برشا أما مازالت بعيدة ... الزب نكرهو الإحساس هذا عبارة على أكت منكي(acte manqué) حسب فرويد ناتج على اكسيتاسيون.مبعد تفكرتها طلعت  boulevard of broken dreams متاع green day .تخيلو الفرحة إلي فرحتها وقتها عبارة على واحد في الغربة و لقى واحد ولد بلادو ... صف شعورك . ليندا تضحك موش حافظة الكلام أما تعرف اللحن ولات تقول حاجات غريبة

I don’t know the lyrics but i am saying any thing pops up to my head

this is really embarassing but whatever i am not on stage

...       

قعدنا نعملو حاجات غبية شوية أما عملنا جو وهذاكا المطلوب مبعد تكلم غسان : "هيا يا جماعة وقية جد ، مهدي أنتي الجديد فينا ختار حاجة نبدو بيها مليستا متاعنا " سكت شوية مبعد قلت نجربو سيتفى ماستر بلاستر لحاجة لي رقشة عليها أكثر وحدة . على كلمتي طارق عيط كيما في حفلات ستيفي : "تراتا! " وقعد يخنتب وحدو ما تبعو حد . في لحظة عطاني سينيال و شماني فهمت متاع حظر روحك بديت نلعب أنا وقتها . ليندا جبدت سمارت فون و قعدت تبع في الغناية . الحاجة الباهية إلي كي تلعب معاهم تحس بروحك مرتاح فماش ضغط . حتى لءكسبريوونس متاعنا براسك كيف كيف فماش واحد هارب على واحد برشا . قعدنا نلعبو مدة مبعد تلفت طارق يحب يخرج يتكيف .   

خرجنا الكل لبرا قعدت كان أنا ما تكيفتش . تلفت حيدر : "والله معلم صاحبي حبيت نبطلو أما العزيمة ما فماش ماكس ماكس جمعة "جاوبتو : "هههههه أنا ما بديتش باش نبطل " حيدر كي لعادة قاعد يسيب في حركاتو الغريبة هبط من حرف الدروج و ركعلى و مقدم يديه و يقلي "يو أر أو جاد (you are a god)"

مبعد ليندا سألتني : "أي مهدوش ، شتعمل في حياتك ؟ تقرى ؟ تخدم ؟ تنيك ؟ شنوا ؟"

حبيت نسيب ضمار غريب جاوبتها : "نعمل في حواجبي وضوافري  " خزرتلي خزرة متاع ملا فاشل و في نفس لوقت تضحك مبعد جاوبتني : "ما تنقيش بار أزار ؟"   

حبيت نقلب الموضوع ونرجع شوية جد : "أنا شبه بطال توا ، نحضر في مموار الماستير في علم النفس "تلفت حيدر قالي : "مالا تعرفنا علاش نمشيو و نجيو هههههه "

ما لقيت ما نعمل حشيتو لروحي : "أي نوعا ما ، أما ماهيش 100 % صحيحة و زيد مازلت كيف عرفتكم دونك باز غالط "

تلفت طارق : "هيا برك مشيلنا كعبة عال جو "

حشمت وليت نسل فيها مشيش نقول حاجة ينغرو ذات مومنة وان يو تحشيه لروحك : "ههههههه لا لا سيب علينا "

عيط حيدر فرد عيطة : "مناش باش نرجعو نبرفو كان ما دور علينا الكل راو في زبي مانفهم شي راو ."

سلمت أمري لربي و تكلمت :

"باهي حيدر همممممم أنتي إنسان طايش ، عندك طاقة قوية تشيخ علي تعمل فيه و ما تحب حد يكسرلك جوك "

ضحك و قالي : "صحيح أي ناكسة "

تلفت لغسان : "باهي أنتي إنسان جدي برشا ، رجال و وايز على خاطرك سكوتي برشا ..."

ضحك حيدر : "وايز ههههههههه جدي ؟ هههههه مرة مشينا نلعبو في وتيل في ليل خرج يجري عريان ههههه قالو وايز  "كمل ضحك و مبعد قال "1-1 توا ليندا "خزرتلها و قعدت مركز معاها وهي ولات تتزعبن زعما زعما توري في روحها كيوت .

"ليندا يا ليندا أنتي راس مالي جمالي ، يأقف ثم "

حيدر ولا يصفق : "معلم والله موش في وجهك "و ليندا ولات خالطة تحب تصرفقني .   

قعدنا نفدلكو شوية و رجعنا نمزكو أحلى جو  تلقى أصحابك عطاشا للموسيقى و يحبو ليعملو فيه يخليك تجي و أنتي شايخ و زيد قابلين بعضهم على طبيعتهم لا حد يحب يغير حد و لا يفرض رايو على غيرو مثال متاع مجموعة فاهمة روحها و عارفة توجهها و حتى طارق إلي زعما زعما الشاف ماهوش فارض ريو بتعسف . كملنا ركشنا نتفاهمو على تيتروات المرة الجاية زدنا كان زوز سانتيانوو متاع ستار أكاديمي والغناية إلي لعبناها ملول .    

طارق تكلم بلقوي : "يا جماعة نعملو قهوة خفافي و بعد نروحو ؟ "

جاوبتو ليندا :" أنا لا باش نروح نمشي للحجامة و نعمل كي البنات الكل "

و غسان : "أنا بش نرسكي معاها ، خلي مرة أخرى ."

ضحك حيدر : "الله لا يكون فيكم ، هيا صاحبي مهدي نمشيو نحنا نحط الوزة متاعي و نخرجو "

عاونتو أنا و طارق في تركيح الباتري و مشينا لقهوة في حومتو . حسيت حيدر الناس الكل تعرفو في الحومة عندو طبيعة جابدة للانتباه . تحبو ، تكرهو أمورك أما ما دامك في حومتو راك باز تعرف حيدر الطفل إلي ما معدل على حد و صانع جوو وحدو .       

دخلنا للقهوة نلقاو الناس الكل عينيها مرشوقة في التلفزة كاينو طرح دربي . شصار ؟ قعدنا موش فاهمين شي . تسمع كان "الله الله الله " ولا "لا حول و لا قوة إلا بالله  " وحاجات متاع واحد مفجوع . قعدنا و حاولنا نفهمو الهدرة . جانا السرفور واحد زوالي و ولد حومة : "أهلا حيدر شنجيبلكم ؟" جاوبو طارق : "قبل ما تجيبلنا ، شفما ياخي في التلفزة ؟ شصار ؟ "

سكت شوية و بعد قال : "شفت اكا الكمشة أنتريتية ، كل ما يجيو يحطو قناة متاع أخبار ويبداو يحكيو ، هاو توا حاطين وثائق على داعش"   

ضحك طارق و قال : " أية مالا يدهم ،هاتلنا شيشة ، تاي و زوز اورنج  "

مبعد تكلم حيدر : "مهدي ، برجلية طلعت ماكش خايب جملة حاجة محترمة برشا ، أما فما حاجة صغيرة التيترواة إلي تختار فيهم ميتال برشا لازم تزيد تسمع أكثر كومرسيال ، حتى الفراب متاعك تحسها أجريسيف (agressif) متاع واحد يتنفس ميتال سي نون الباقي الكل جوو باهي لعبة نظيفة صحيحة نوتات تخرج فيهم ما عندي ما نقول فماش ديكالاج جوك باهي . "

سكتنا مدة قعدت نسمع في الشياب شيحكيو : "والله داعش صنع يهودي ، البغدادي أصلو يهودي إسرائيلي  حاطينو المخابرات "

"يحاربو في دين الله الحق ، همهم الوحيد تدمير الإسلام على خاطر فاضحهم ، يشوهو فيه أما هو سينتصر هاو توا ماشي في ألمانيا و فرنسا  "

"شوف و نتفكرو بعضنا أمريكيا هي إلي عاملتها مو قالك راهي تحب تخلي الشعب يعارك روحو و مبعد هيا تدخل في الطرح "

تلفتت لطارق : "الزح إسرائيل شماعة أي فشل ، مشكلة يطيشوها هي السبب  "

شعل سيجارو و قال: "كيما أي واحد فاشل ما يحبش يستعرف إلي هو غالط أما يقول غير غالط "

جاوبتو حبيت نجس إلي هو موافقنى ولا لا : "شتقول على داعش ؟ قصدي كيفاه تقول تعملت "

تكلم حيدر من غادي مكرز : "سيبو زبوبنا مل موضوع هذا بربي "

ما جاوبنهوش الزوز و تكلم طارق حب يفسرلي وجهة نظر متاعو : "باهي إلي نخمم فيه لوجيك برشا أما هم عباد يقولو عكس هذاكا"

سكت شوية و أنا زدت ركزت معاه و كمل كلامو "لحكاية بدات مع صدام حسين ، ما تقليش صدام خوانجي أما وقتلي سكرت عليه و ما عادش فيها عمل حاجة كيما إلي عملها القذافي ، لعب على الدين و قال نحارب بإسم الدين "

حيدر كرز و خذا تليفونو و وحل الفن وأنا قعدت نخزر مني فاهم شي فاش يحكي و زاد فسر شوية اخر : "باهي ، صدام كي ما عاد فيها وين قال باش نحارب بإسم الدين الحاجة الوحيدة إلي تنجم تهيج الناس .... مبعد إلي صار كان قاريلو حسابو ولا جات بطبيعتها الله أعلم . أني واي توا داعش قعدة تاخو  في قوى كبيرة والريوس الكبار متاعها جماعة صدام القدم ديجا عندهم قوة عسكرية كبيرة و مبعد دخلت فيها السيطرة على حقول النفط وهوني دخلت أمريكيا في اللعبة يساعدها تشري بأقل سوم من عندها و تاخو سلاح بأرخص سوم من غيرها   "

أنا مني فاهم شي : "يعني صدام هو إلي بداها ؟ "

حب يزيد يوضح : "شوف ، أمريكيا عملت حظر جوي و بري على العراق و دعمت المعارضة بش تحشيها لصدام أي و زيد حظر إقتصادي فاحش وقتها عمل اللقطة هاذي و سماها الحملة الإيمانية ما نعرش كان سمعتش بيها ؟ "

أنا : "همممم والله شي ، عمري ما سمعت بيها ."

جاوب هو : "لا علينا ، وقتها سكر البيران و عمل إلي ما يتعملش و كتب الله أكبر على العلم . شحبيت نقلك ، أمريكيا مساهمة بطريقة غير مباشرة في صناعة داعش أما هذي كيفه بدات الحكاية ."

حسيتو قاتلها داعش زدت سألتو : "و كيفاه يجيبو العباد ويستقطبو الناس و فما من أنواع مختلفة مالناس تجي معاهم "

جاوبني و بخزرة يحب يقلي يا نوب : "باهي داعش عندها ما يكفي باش تستقطب الكفاءات عندها فما إلي يجي حب لدين و حاجة غفلت عليها دول العالم العربي ... كونك تحس في روحك يوزلس في بلادك و تولي عندك قضية و مبادئ تدافع عليها يعني تحس بروحك عنصر فاعل في مجتمع . فما إلي يمشي باش ينيك ينيك الحالة و فما إلي ياخو سوم باهي ... بون لخرة موش متأكد أما فما شكون يقول هكا و لوجيك الحكاية هاذي "

حبيت نزيد نستفسر : "باهي مالا كي هوما فيهم نخبة مثقفة علاش هل توحش الكل ؟ علاش التفنن في القتل ؟ "

زاد شعل سيجارو اخر و مبعد تكلم : "شوف ، داعش رغم إلي هي تنيكلها في أمها على عجلة أما عندها حاجة خلاتها تاخو القوة هذي الكل هي الديسيبلين أي واحد يعطيه أمر يتنفذ يعني كي يجي واحد يقلك أعمل حاجة السمع والطاعة زيد الفساد إلي عند إيداراتنا ما فماش غادي يعني إلي يعملو فيه خارج صحيح 100 % أما نحنا شوف كيفاه  "

قصيت باهت "ياخي معاهم ولا معانا ؟ "

قعد شوية يخمم باش يذلني مبعد قالي : "التوانسة لازم يتعلمو درس كل ما يجيو يخرجو فلوس ، كل ما يكح 20 دينار و يخزر لشخص إلي مصور لازم يتفكر كلامو ...خير الدين باشا قال إلي المهم في الدرس تعلم ملعدو متاعك موش مشكلة وقتها جو يلومو فيه كيفاه متأثر بفرنسا   "

قتل السيجارو متاعو و كمل كلامو : "داعش عاملة هذاكا بش تخوف العدو متاعها ، عاملها رئيس كوريا الشمالية ، عاملها برشا ملوك قبل تاريخيا مقبولة أما إنسانيا لا . تصور أنتي يجيو يفكولك أمك بإسم الدين و يبيعوها بإسم الدين ، أختك ، مرتك و كان تقتل إلي يبيع ولا إلي يشري تسمى كبيرة ... هذا دين؟ هكا تعلمنا ؟ لحاسل حكاية طويلة سيب علينا "

سكت شوية و مبعد قالي : "يعني كي تقارنها بلقاعدة هاذي طير عليها و مطورة اكثر ، نحكيو فلوس . داعش أوتونوم عليها تصور أنتي في 2014 عندها 11 حقل نفط يعني 80 ألف برميل يوميا  ، تصور أنتي قداش من واحد تخطفو و يسيبوه بفدية بخلاف الغنائم متاعهم .و بخلاف عندها ضربات تجارة بلأثار. يعني كوميرس ناجح ، منوع و لعبة كبيرة  "

زاد شوية و مبعد قالي : "هاني بش نعطيك حكاية برشا مالناس حاقرينها أما هي مهمة "

ضحكت و جاوبتو كي الملهوف : "أي أي هات "

ستوى الكرسي مقابلني وبدى يحكي: "باهي نحكيو على العراق توا عام 2008 ... المالكيإنسان  أحمق و الروايات تقول ماعندوش مخ هههه حب يرد الجيش العراقي طائفي قمع جماعة السنة و خزر لدينهم ما خزرش لهوما شينجمو يعملو . فما قوات الصحوات هوما جماعة سنية مترانين جوهم باهي في بلاصة ما يدخلهم في الجيش طردهم و ولاو توا مع داعش و البغدادي معمل عليهم بصفة كبيرة "

عمل رشفة من شربو و كمل : "هههههههه السيد بهيم لدرجة أنو صار تفجير في وزارة المالية و الخارجية فرد وقت .لحاسيلو ، صديقنا الصدوق عمل كيما بن علي ، قمع المعارضين متاعو ، حشاها لسنة طول و عرض و صرف لفلوس الكل في الجيش في بلاصة التعليم و غيرها ... بلغة أخرى ناكلها الأم متاع أمها . كي خرجت أمريكيا عام 2011 بام السنة هاجت و تمردت و صار تمرد طائفي .  "

حسني ضعت ياخي حب صفق و تكلم : "ما تضيعش ! ما تضيعش ! ملخص الحكاية فما شيرتين المالكي الأحمق محق جماعة السنة والقاعدة من شيرة أخرى تدعم السنة الريفليتى (révalité) هاذي بدات تشعل في النار و 2012 تلقى داعش خدمة ساهلة جاتها كيما نحب نسميها لقمة باردة "

و بعد ما ربطت الخيوط في بعضها كمل حكايتو :"البغدادي أول ما ضعفت العراق مشى حد على أبو غريب و التاجي منبع متاع جماعة تنظيم القاعدة و بطبيعة خرجهم ... تصور أنتي 500 واحد ناك المسبط على راسو وخرج ... ههههههه عقلية مصالحة زعما و ننساو إلي فات و نعملو صفحة جديدة ؟ أي دونت ثينك سو . "      

ختم كلامو : "باهي كان بش نقارنوه بصدام ... صدام دعم السنة و قمع الشيعة ، العكس صار مع المالكي أما مع صدام فما إنجازات مع المالكي من سيئ لأسوأ ... صدام قمع الشيعة أما جيشو كوادرو شيعة و حارب إيران بجيش شيعي نوعا ما . صدام عمل جيش قوي و حارب الأمية وأهم حاجة حافظ على وحدة التراب...المالكي حرب طائفية ، فساد على عجلة و حب الوطن في الحضيض  "

مبعد حكالي على سورية : "سوريا عندها حاجتين الداخلية و الخارجية نبدا نحكيلك على الخارجية : سورية رامية الصحبة على روسيا و الصين و إيران هذاكا علاش الحل سياسي و العسكري للأزمة صعيب بخلاف سورية تدعم في حزب الله و فلسطين بلاسلحة دونك توجها واضح و إسرائيل مكبوسة على خاطر الارهابين حتى و كان نفرضو إلي هوما صنعها ينجمو يدورو عليها كي ينتصرو و توا الجيش سوري قاعد ياخو في صواريخ مضادة لطيارات من عند روسيا يعني قوى في الجو .أما لداخل حبو يوليو ما أحلاهم و يعملو ديمقراطية ياخي بشار قمعهم دونك قلت بعضها ساهلة برشا .أما لثقافة العامة فما 4 تكتلات عشائرية يعني بلغة أخرى 4 ترويكات  فما الكلبية إلي فيهم العلوين متاع الأسد فما الخياطين  الحدادين و المتاولة و كي دخلت في حيط ولا فما الجيش السوري الحر متاع المعارضة مبعد جات الجبهة الإسلامية عام 2013 متاع السعودية يعطيها عصبة طرية خايفة مل الدولة الإسلامية و جبهة النصرة لحاسيلو حكاية طويلة وكان بش نكملك لازم لصباح و شوف و شوف   "

قعدت مبهم و مبعد قتلو : " هذا الكل منين ليك هاك متبع و فاليها هههه "

ضحك و جاوبني : "مصوحب عراقية  "

فشلت و ضحك و قتلو : "هههههه ملا ضارب "

داعش من أكثر الفتن إلي صارت في عصرنا الحلول باش نحاربوها عمرها ما كانت بلسلاح بركا ، يمكن السلاح يعطي حل وقتي أما للجيل الجاي ولي بعدو  لازمو العلم كسلاح ردعي .  

علاش ما سمعتش بتبادل خبرات في مجال التكنلوجيا ولا التعليم ؟ علاش ما سمعتش ببلاد عربية جابت خبراء من بلدان ناجحة في ميادين علمية يفيدونا بتجاربهم ؟ بالك خاطرنى أطرش .     

previous> 

<next