حوماني

أنا : "هيشو ! هيشو ! يا هيشو !"

خرجلي بوه وحدة وحدة ، راجل ماخو الانتريت ما عندو ما مزربو إنسان كالم و فدلاك في نفس الوقت : "أهلا بلجوناس ، شنوا متواعدين ؟ "

أنا : "أي عم عون، طلبتو و قال كي تجي جاي تعدالي . "

ضحك الراجل و قالي : "لحظة ، راهو راقد ، نوضوه ."

هشام واحد من صحابي المقربين . عرفتو من ايمات الصغرة أنا وإياه عكس بعضنا في كل شي أما تجمعنا صداقة قوية .عرفتو بسبب نكتة تافهة عالاخر "حاجة بيضة تنقز من شجرة لشجرة ". رجع بوه :

"هيا يا سيدي هانا نوضناه ، هاو جاي . قلي توا شنوا الحجامة إلي عاملها ؟ "

ضحكت على خاطر نعرفو قالق و يوسع في بالو و جاوبتو : "الحجام غلط في بلاسط ينحي للوطاني و يخلي شعري غلط قلبهم  "

جا هشام : "أهلا مهدي ! بابا نحب ألفين ."

عم عون خزر و جاوبو: "الصباح عاطيك 5 لاف لاش نزيدك تحمل مسؤوليتك ."

هشام تخمر و ولى يعيط : "شنوا توا ! ركوب دخان و قهوة شقعدلي أنا "

بوه زاد مرجو شوية : "هذاكا هو ! تعلم ، في وقتنا 5 لاف تعيش "

عم عون كان بروف فيزيك ، يعني معدي عمرو الكل مع الشباب و المراهقين يحب يعملهم . ديما هكا علاقتهم ببعضهم   

دخلني لدار نلقى صحن مرقة و خبز بحذى بيسي هشام ، لمخدة كلها ريقتو ، السيد روح ديراكة فطر ورقد. ينعمبو القراية إلي خلات العبد هكا داخل في حيط .

كل ما ندخل لدار نسئلو نفس السؤال: "هيشو ! فما محشي ؟"

سي الهش ضحك و قالي : "أي نحشيهولك، باش تحبو ؟"سكت شوية و مبعد قالي : "تو كي تروح سوسو من توتنهام تو تجيبلك " باهي قبل ما تدخلو بعضكم كي كنا صغار كنا نسميو تاطاوين توتنهام دونك كان تعاود تصير ما تضيعوش.

قعدت قدام البيسي متاعو نلقى وحدة قاعد يحكي معاها طلعت في الديسكوسيون الفوق نلقى صاحبي يتمعشق معاها

عيطلو : "هيشو ! هيشو ! فما وحدة اسمها أسماء بعثتلك ميساج " دخل بعضو شوية و ولا يحكي بشوية عبارة صحرها جملة : "تلفها ، هيا أخرج ، طفلة وبرا نعرفها عال فايسبوك ."

حبيت نزيد نبربشو : "  هههههههههههههههه  تي هاي قتلك بيبي توحشتك شنقولها ؟"

هشام شنع : "تي سيب الكازي خدمتي غادي "

أنا وليت نفصص : "بيبي ! ضربني الشياح ، شكونى هذيكا ؟"

الطفل ولا يسل فيها : "هههههه تي سيبنا أخرج خنمشيو "

ليوم متفاهمين بش نعملو لمة بين أصحاب إلي قرينا مع بعضنا في ليسي ، لينا سنين ما تلميناش كل واحد فاش تلها و ما عادش نلقاو وقت لضحكة كيما هكا . الشلة هاذي عشنا مع بعضنا أيمات تقعد محفورة في ذاكرتك ، حتى كي تبدا فادد ولا متقلق تتفكرهم تتفرهد .

القهوة هاذي مقملا برشا أما شالت ذكريات 7 سنين ، ياما هربنا و جينا نلعبو أطراح رامي . ياما دربيات جيناها . أوراق بروومووسبوور تعمرة هوني . مولى القهوة لاعبها ناصح و قاللنا تلاهاو اقراو و ما عادش تجيو . ياما عمايل تكمبصة هوني و عركات تكتكنالها . عباد تقدر سوم القهوة ببلاستها  و أحنا نقدروها بتاريخها بتشردو فشلو ضحكو ... هشام ، نادر ، عصام ... كان موش ملحيونات هاذي راو ايمات المراهقة كانت فشل ضريع .        

تلمينا ، نفس الرهووت المقلبة ، شوية كبر شوية لحي أما التفوريخ هوا هوا .قعدنا نتفكرو في جونا و نحكيو في حكايات بالك فاتت واحد منا . جبد نادر هدرة : "مرة حالين ساكس كام مع وحدة من ألمانيا جا سي أمين يوريها في البرا متاعو تفجعت . قعدنا نخزرو شفما ، شصار ؟ طلع ضبابطو بالشعر تكونسينا ." ترشقنا الكل بالضحك أكثر واحد هشام : "خخخخخخخخخخخخخخخ ينعن جعب عمتك خخخخخخ السيد هذا شعرة لا عداوه ترويج كوكاين "

زاد شوية و قالي : "تتفكرها كي خرجولك فرينا صبة من ساكك "تكلم صنوع : "وا كوكة كيفاه هذي ؟ "   

جاوبتو و غالبني الضحك : "هههههه مرة قاعد في سيانس فرنسي هههههه خرجت نجيب في بيي (billet) تلفت حمادي خرج شكارت فارينا ويعمللها مادام إيل يا لا كوك هههههه   "  

جبد نادر نفس ملشيشة و مبعد تكلم : ""تفكرو بروف الفلسفة ؟ إنسان عالمي هذاكا . قاللنا على حكاية ما تجي على بال حد . "

سئلو صنوع : "شنكرهم جموع تبعدك على دينك "

جاوبو نادر : "ههههه لا لا هذا قالك إلي حتى في غنانا الغرامي الشعب ماترياليسة"

لكلنا حربناها ضحك وقعدنا نستناو في كمالت الهدرة ومركزين معاه .

ترشف نادر التاي و بدا يقلد فيه : "جانا السيد هذا يحكيلنا قال إلي التراث تلقاه في الأدب . مثال الأدب الأمريكي اللاتيني يحكيلك على ثورات على حرب . الأدب الياباني يحكيلك على هيروشيما ، على حبهم لوطنهم ... الأدب اليوناني يحكيلك على هيرا زوس وغيرهم الأدب العربي يحكيلك على الحب والعرس والأدب التونسي ... قص عليه وقتها هيشو يعملو مسيو الجمعية "

نتلفت لهشام نلقاه مهبط راسو ملظحك ويعمل : "يهلكك هههههه ينعن جعب عمتك  "    

كمل نادر الهدرة : "هههههه راهو بهيم . قالو وقتها جمعية ترمتك يقلك إلي النساء ماتريليسة . وعطاها ضحكة خزر يمين ويسار وقال آه مالا شوفو فاطمة بووساحة : يا عم الشيفور ، كرهبة كمال . تحب في واحد موتوريزى ، ززار الحومة تحب في تاجر و تاجر في أغلى المنتوجات المأكولة ، برا روح متاع نور شيبة الزوالي ما يعرسش . يا ولدي بروف إيلوميناتي في مخو "

هشام عيط تفكر حكاية أخرى : "تتفكر لبروف إلي بعبصوه مشى يجري يعيط للقيم العام يعملو حسيتها يا سي عثمان حسيتها ولا كمال كيفاه قص مع صاحبتو  هههههههههه  "

تفكرت اللقطة وليت نقلو : "أي أي خلاها و مشى مع وحدة أخرى وصلها لحومتو  "

ضحك صنوع و قالي : "من وراني أنتي شكنت عامل "

جاوبو هشام محلب : "يا ولدي هذاكا ما فمش طفلة ما حبش يحكي معاها ، منهم وحدة هي هاربة و هو وراها ههههه يا معلم مرة زادة وحدة قلنالها كوكة حب يصوحبك ولات تبكي . "

ضحك صنوع و سئلنى : "ههههههههه توا بلحق هذا ولا ؟ ستناو عندو الحق يدافع على روحو "

سكت أنا وقتلو : "للأسف ليحكيو فيه صحيح أما مش هكا صار جملة  "

تلفت هشام و قال بكل حماس : "لمهم صحيح ! كهو "

صنوع مسح لحيتو و قال :"ايييييه يا جماعة كان تجيو معايا و نتلمدو في دار الرحمان ونصليو كل وقت و وقتو موش خير؟"

جا هشام حب يشنعها : "توا نحنا متفاهمين ، أما هذا كل مرة يطلع بطلعة و يتفلسف على الدين ... ما ظاهرلي "

صنوع ضحك و قال : "لا لا سيبو كوكة متاعنا تو نتلهاو بيه . نردوه واحد صالح يعرف كان ربي والنبي "

هشام همو يشنعها : "قلو ، لازمو شانطي في مخو . مرة قالي عيسى عندو بنتو ، و مرة قالي فمش مسيح الدجال و كل مرة حكاية . الطفل بش يضيع "     

تلفت نكبس فيه : "هشام "

خزرلى : "ههههه شنوا نحشي فيه ؟"

تلفت نادر عمل رشفة تاي و قال : "زايد ما ترتاح كان ما تشنعها "

خزرلى صنوع و قالي : "شنوا لحكاية هاذي ؟ "

جاوبتو متاع ما نحبش نحكي في الموضوع هذا : "سيب علينا حكاية فارغة . ما نحبش نحكي في الهدرة هاذي "

السيد كبش ، رغم تتليفاتي الكل ، محاولاتي الكل و شي كبش فيا صحيح باش نحكيلو .

وليت قتلو : " نرى الدين ، بمنطلق منطقي ، يعني ربي في القرآن حذرنا من فتن صغار ، كادو باش يحذرك من أخطر فتنة في تاريخ البشرية ،  المسيح الدجال بش يخرج و يرد الجنة نار و النار جنة ؟ و عينو كل مرة كيفاه ... بقص واحد يبعدو 50 ميترو يقتلو و يحييه . يجي بحذا بلاصة قاحلة يخرج كنوزها و تقعد تبع فيه كي النحل ... هذه أكذوبة عقلي ما عادش يقبل هذه الأكاذيب ربي حذرنا من أزواجنا ، حذرنا نحبو أولادنا و ما نمشيوش للجهاد ... أما ما يحذرناش ملدجال . توا فما 7 مليارات نسمة في الأرض و يمنعو 7 ألاف بركة ؟ و الله رحمان رحيم  .... حاشا و كل "

شنع صنوع أما مخلي لإحترام بلاصة : "يا خويا ، راهو الشي هذا موجود في السنة ، من علامات الساعة عبارة أنتي مسيت من أركان الإيمان .أنتي كان تأمن بليوم الأخر راك تأمن بهذا الكل  "

جاوبتو ديراكة : "توا ربي قالك بعد أعوذ بالله وإذ تأذن ربك ليبعثن عليهم إلى يوم القيامة من يسومهم سوء العذاب إن ربك لسريع العقاب وإنه لغفور رحيم  في سورة الأعراف هذي تحكي على ملة يهودية يعني اليهود بش يقعدو ليوم القيامة و الأحاديث تقول إلي عيسى بش ينحي الملل الكل ما عدا المسلمين ذيس ايز برادوكس ."  

مازال صنوع حابب يقنعني : "الإسلام دين الحق ربي جاب الإسلام رحمة الكفرة هذوما يحاربو في دين الله على خاطرنا على حق. الكفار إلي عملو حاجات باهية يلقاو جزائهم في الحياة الدنيا  ، الله العدل "

حبيت نعمل استعراض منطق : "باهي نحكيو شوية مات : باهي في الدنيا فما 7 مليارات بشر ، فما حوالي 7 /1 منهم مسلمين و مل سبع درا قداش من طائفة . يندرا ربي بعث الناس على خاطر بش يحرقهم ؟ يعني أحسب أنتي فما من 7 مليارات فما 50 مليون بركة باش يدخلو الجنة . هذا الرحمان ؟"

صنوع شنع : "عمرك شديت مصحف ؟ قريتو ؟ مشكلتك ما تعرش  حاجة في الدين . قريت ابن تيمية ؟ما تعرف شي و تولي هكا؟ أستغفر مولاك و توب لربي هو عم الرسول و باش يقعد في واد كي النار تمس في كعبو مخو يفيض . "

حبيت نفسرلو إلي السنة فيها و عليها : "شوف القرآن صحيح ما فيهوش جدل ، المشكلة قعدت في الإنتربريتاسيون متاع الناس و خاصة الحديث . جاو الناس ما حبوش يدخلو في الأمور هاذي و خلاو أهل الخصاص . تخيل أنتي خرج علم فيزيك كونتيك دخل الفيزيك اليومية متاعنا في الشك وقتها خرج الفيزيك هذا أينشتاين قال شنوا هل هراء هذا ؟ فما بالك فتوى . نرجعلك للحديث وهذا برشا ناس ينكرو فيه البخاري مات و هو يجمع في الأحاديث ، فما برشا أحاديث ما قالش علاش الرسول قال أكاكا دونك كل واحد و شيقول و شيفسر و تخرج الفتوى على كل لون يا كريمة . مبعد جا مسلم و خذا الباز الغالطة متاع البخاري و بنا عليها عطات حاجة هكا . "

حب يفسر صنوع : "نحنا في تفسير الحديث ناخذو السند  سلسلة الرجال الموصلة للمتن إلى قائله. مثلا روى فلان عن فلان عن فلان عن رسول الله صلى الله عليه و سلم و المتن ا ينتهي إليه السند من الكلام. اي انه الكلام المنقول كان ذلك عن قول الرسول صلى الله عليه و سلم او عمله او اقراره او غيرها الحديث علم وحدو ماهوش لعبة يا راجل برا توب عيش خويا "

لحكاية هاذي ما نحبش نصدقها جاوبتو : "أمان فما أحاديث تختلف مع القرآن جملة و مسجلين صحيح فما برشا أمثلة ... يعني الحديث كي تسجل يا إما الحديث غالط يا إما الحديث ماحكاوش عللاش تقال يعني في كلتا الحالتين حاجة غالطة"

صنوع طارتلو و قام : "سامحوني ما عادش نجم نقعد يزيها والله ما نقعد "و مشى طيرتلو . تلفت لهشام شانع : "زب عليك ! ديما تموت على خلاها توا كنا عاملين جو تجي تعمي زك أمها ." و مبعد زدت عيطت : "يا صنوع ! ايجا و صلي على مولاك "  

صراع الدين و التاريخ ، الدين و العلم حرب قائمة فما حقائق المتدينون و الإسلاميون خاصة يخفيوها ولا يتعمدو تزيفها لأغراضهم مثل أكذوبة الإسلام صالح لكل زمان و مكان ، الإسلام في خطر ، نظرية الغرب الكافر يحارب فينا على خاطر الإسلام و المشكلة فما ملاين العباد تصدق . نجم نكون غالط و ماشي في ثنية غالطة أما كلام الشيوخ متاع آل ضبوط ما عادش يدخل مخي .  

يتبع

previous> 

<next