الترنديفة

فما شكون يقول كي تحكي مع الكراش متاعك عبارة تبعبص في قنبلة ، ما صارتلكمش مرة حاجة هكا ؟ ولا انتوما من نوع عصبة ليها ؟ كان اكاكا تنجم تسميها كراش ولا تعتبرها طفلة زبور و وهقت ؟ باهي مانيش بش نعلمكم كيفاه تركحو بنات أما حبيت نقول  داخل بعضي شوية . تتفكروها شيماء ؟ اكا سرفوز (sérveuse) المزيانة  إلي بضحكتها طيح 10 رجال كاو . لحاسيلوو قعدت نحكي معاها على الفايسبوك وليوم متفاهمين  نتقابلو نعملو قهوة . كترنديفة مع طفلة ما عنديش مشكلة مشات ولا جات نوت بيج ديل ، أما لمرة هاذي الطفلة عاجبتني وما حبيتش نخسرها . في العادة فلسفتي تقلي كان عندك حاجة خايف تخسرها ، اخسرها تو ما عادش تخاف . ههههههه لمرة هذي كان خسرتها نقعد على حديدة ونرجع نصطاد في الثعالب .

قبل بنهار مشيت لحجام زدت حصرت لحيتي نظفت سباطي مليح وعطيتها حقها كان جا ليدي راني مشيت شريت قش جديد .عندي صاحباتي بنات يحكيولي يركزو مع الشقيقة والدقيقة كان تتطلع اكاكا وتكنترني على حاجة ستيل هذا يا خيبة المسعى . أي ماسنة فاك أب(I Must not fuck up) ، تنجم تكون ذو وان .          

وصلت وين البلماريوم طلبتها وينك.  قالت في سونتر فيل تمشي ، بدات عمتك الأدرينالين تتطلع  وليت بيني وبين روحي نحكي يا معلم لتعدا  شوية ؟ بعد عزك و علم النفس إلي تبهبر بيه عالعباد ، كي ياقف قدامك واحد تعرفو  علاش ماشي  وعلاش جاي لعبت موزيكا في ابن رشيق و ما خفتش هكا ، عملت محاضرة في أنفي يهز 300 و عملت كومبلى ومازالو الناس واقفة و ليصارلك على خاطر طفلة أكثر من هذا ... يا ولا حال . مبعد قعدت نحاول نعمل تمارين متاع يوجا (yoga) قعدت نتنفس ونركز مع الهواء  الداخل خارج كي قدر عليا ربي .       

مافقتش بيها كي جاتني جات من ورايا ودغدغتنى من أجنابي ، تهزيت وتحطيت وتلفتت كي ريتها قلت : "شبي دين ... أه  شي شي أهلا شيماء "  الكو دو شوفال (queue de cheval)مازال موجود لابسة مريات شمس مريول مارون مزين بلماع سروال دجين حاطة أكثر مكياج ملعادة أما مواتيها موش كيما البوكيمونات إلي نرى فيهم هجوم التلكيز تخرج كي عبيثة نص الليل . قعدت بيني و بين روحي حاطة الحطة زعمة على خاطري ؟ زعمة كي تبدا البرة تمكيج ديما هذا الطبيعي متاعها ؟ فايسبوكها ما فيه شي دار الظلام زنقة العميان  أه ملا جوجمة .      

ضربتني بساكها وتعملي : "تقول في الكلام الزايد سي الشباب ؟ تحشمش معاك طفلة ؟ موش بش تتعدالك بالساهل، هيا وين بش تهزني "

كنت عامل حسابي من قبل ، نهزها للعنبة بلاصة رخيصة وموش في بنليو و في  الوقت محلاها باش متقولش راو يفشلم عالدخلة ولا تقول ناوي على حاجة و تدخل بعضها وتكنترنى . قلتلها "العنبة في المدينة العربي تنجح ." تلفتت كي العادة جيفينج (giving) مي هارد تايم : "توا هكا ؟ نخدم في قهوة و تخرجني تهزني لقهوة ؟ راك فاشل في بالك ؟" نعرفها تفدلك أما كي  تحسسني بالذنب وليت قلتلها : " تحب نمشيو لبلاصة أخرى ؟ موش مشكلة  "  تلفتت : "أه  منك باش تعذبني ما عادش  تعاود  صنعتك "  فرحت كي قالت أكاكا ،  هذا  يعني نشوفها مرة  أخرى قعدت نمشي وفستيفال في مخي .

في الثنية شديتلها يدها وقعدت نمشي هكا ، لي عجبني في شيماء طفلة ذكية و مش معقدة ماهيش قارية حتى طرف نقص في روحها . زعمة على خاطر غاطس للعنكوش ما نراش في عيوبها ؟ والا هي هكا كلها برفكت ليا ؟ تلفتت الطفلة سألتني :

"توا شتعمل بضبط في قرأيتك ؟ " حاولت نرد قرايتي ما كيفهاش : "أنا نقرى علم نفس ، فيه علم اجتماع و حضارة و كل ماهو مربوط بتشخيص الذات البشرية " حبت تحلب عليا   : "واو و باش يطيب هذأ ؟ " كملت الفيلم إلي نعمل فيه : "يعني أنا نجم نعرف عبد علاش يمشي و علاش يجي  نجم نعرفو علاش ناوي  نفهم طبيعتو و برشا حاجات أخرى " كي العادة شيماء ما تفوتش لحظة  باش تعطيني مرتدة  :"يعني قاري كيما مماتي تنسنيس وتقطيع و تريش في ظهور العباد " ما لقيت ما نجاوب دخلتني بعضي و أحرجتني كي نبداو على الفيسبوك كل ما تعمل عملا هكا تبعثلي سيكونس رؤف خليف يعيط يوزعععععععععععععععع جاتني سلمات المرة هذي .     

مرحبا بيكم في العنبة ،  مكان الهروب متاعي من صخب الحياة و ستراس البرووجيات . ماخيرش من ركشة غادي باش تفرغ مخك . صدقوني تخزر للحيط و تسمع موزيكا من قاع الخابية خير من ركشة في وتيل و مساج و الريق هذاكا الكل . مشيت باش نكلم حمة على شرب قاتلي شيماء تحب قهوة . خزرتلها  وجايبها سيد العارفين : "نصيحة ، كي تجي للمدينة و بلخص العنبة هبط تاي نصيحة  ههههه " ضحكت حركت راسها و قالت  :"باهي تبع السارق لباب الدار".     

قعدنا راكشىين تلفتلي :"ترا وريني كيفاه تعرف لعباد ، كيفاه تفيق بيهم ؟ " خزرت نلقى واحد شادد جيتار و يلعب في زينة ، حاجة إيزي : "شفت إلي يلعب بلجيتار هذاكا ؟ باهي أول ما تشوفو تلقاه ما عندوش ثقة في روحو " حسيتها ملي كانت تفلدك خذات لأمور بجدية : "كيفاه ؟ " وليت نحلل :"باهي ، أول حاجة ملوك شعرو بوكلي و لابس برشا حكايات في يديه يحب يوصل لإيماج متاع الطفل المراهق الطايش الضارب ، مريول ميتال و يلعب زينة دونت ميكس يا يفلم ماهوش ميتال هاد ولا يحب يجبد الانتباه ، كان جا يحب يغني راو حاجة مل ثنين يا بلاصة كالم ولا يلعب مع الجامووسي دونك راو يجبد في الانتباه يعني ما عندوش شخصية وقاري النقص في روحو " وراتني واحد اخر مع صاحبتو:" وهذوكم"  قعدت شوية مركز معاهم و بعد قلتلها  : "باهي الطفل تحسو كالم. كل شي سامبل ،ما فماش حاجة تجبد يعني تنجم تقول جاي من مجتمع متوسط ولا مفرهد شوية. الطفلة لمعاه تحسها طايشة هاي خذات سلفي هاي هاجت حتى من حوايجها دل أنها تنفزتى(investi) برشا في الريق دونك راي خارجة معاه من داعي الفيس و هو راو ناجح في حياتو الإجتماعية عندو كرهبة ولا بوست باهي." ضحكت و تكلمت : "أي أي شرلك هولمز أصل باهي وهذوكم إلي من غادي " وراتني  كمشة عملت رشفة تاي، شديتلها يدها ،قعدت مركز معاهم و بديت نحلل  "باهي جماعة عاملين جو، مرتاحين مع بعضهم، ليهم برشا على لمة. إلي يحكي بيديه هو الألفا. محجم لحيتو يعني سوسيابل برشا و شعرو بوكلي. كيما فسرتلك ضارب يعني السيد هذاكا سوسيابل برشا و ضحكة معاه . دخلت بعضها شوية :"مالا لبلحيتهم " قعدت ساكت نظم في أفكاري بعد جاوبتها : "الحية الحية ، الحية كيما بوبز ، بيجر ذي أر ذو لونجر يو ستار  (Beards are like boobs, the bigger they are, the longer you stare ) " الطفلة ما عادش تنجم مالضحك : "ههههههههه ، يهلكك ، منين جبتها هههههه ماعادش نجم ".

رجعت شوية  سريو وكملت : "برشا بحوث صارت في موضوع اللحية ، منهم  مقال في فيجارو (le figaro) يحكيو إلي الراجل بلحية سريو أكثر ، حربي وتعطيه هبة و وقار هاك تشوف أنتي الرجال قبل وحشية أكثر ، وقليل وين تلقى راجل محجم لعكس في أيامنا هاذي ، منهم واحد مصري قال قبل ما يجيو الإنجليز لكل كانت بلحيهم هوما جاو و سلمو في مصر و رجوليتهم يقصد في اللحي ، بخلاف تعطي سووكسي (succès) مع البنات " قصت عليا لقات فاش تفصصهم  :"يعني طيح فيا بطرف شعر ؟" مشيت معاها في الخط : "وكان عجبك " ضحكت وجاوبتني : "باهي باهي ، لحساب يجمع و يطرح هاي مرشومة ، كمل توا "

ضحكت حاجة عاطية على كلام يضحك و واحد تحشالوو و طاح لوف : "باهي لخايب في اللحية تخلي السيد عاقدها و ما يدخلش روحو في الجو موش كيما لمحجمين تلقاهم سويسيابل أكثر " .

قص على حديثنا بلعسل راجل لابس لبسة عربي ، جبة جوهري شاشية  ناصب شيشة و قالي :"و أنا كيفاه تراني ؟" ضحكت و خزرت وعجبتني منو  اللقطة : "باهي ، يا سيدك يا بن سيدك من جبتك إنسان زمني و كلاس برشا " و هو قاعد يتبع فيا : "إي ، كمل "كملت كلامي : "من ضحكتك إنسان شبعان ، موش بفلوس أما كلي عندك علم و تبسيمتك متاع إنسان شبع مالدنيا كاينك متزهد ". ضحك الراجل و قدم روحو : " ههههههههههه تبركالله عليك جبتها قد قد ، أنا مقدم في مقام سيدي بلحسن الشاذلي ، مرحبا بيكم في زردة، في ذكر إيجاو حضوركم ينورنا  "نتفكر أنا صغير حكاولى على جماعة الزوايا ، قالولي ناس طيبين كلامهم سمح ما تسمعش عليهم أعوذ بالله . تبسمت و جاوبتو :"حاضر يا سيدي نشالله نطل ما فيها باس ."  

تلفتتلي شيماء حبت تعملي  كموسة مع الراجل : "شنوة توا موش فيبالي بيك ما تمنش بلخزعبلات هاذي يا ناري عليك ،  يكب كبوبك يا شيماء  صمتي صمتي وفطرتي على قرعة "تلفت الراجل يضحك ويعملي أنستك بيها ما لقيت ما نقول الراجل  فرض احترامو بمنطقو و زيد عندي فكرة عليهم صحيح مشوشة أما إلي متأكد من إلي هو مسالم لدرجة كبيرة . جاوبت شيماء : "الراجل مستدعيني لمحلو نقوم نقلو راك بيك وعليك هههههه "

ضحك  الراجل  قال : "ما شاء الله ربي يحفظكم ببعضكم ، أما يا أولادي ، نحنا الصوفية ما نعبدوش القبورات ". لحاجة إلي تعجبني في شيماء تعرف وقتاه    توقف على التفدليك سألتو : "باهي مالا شتعملوو "

جاوبها : "أحنا بنتي يسميونا الصوفية ، بمعنى تزهدنا من الدنيا أي ما عادش حشتنا بمتاع الحياة الدنيا و نلوجو على الجنة نسأل ربي تكون منالي و منالكم و منال جميع المؤمنين  "

قلت : "أمين" مبعد سألتو : "أي بابا أما شنوا حكاية القبور هذي "

عمل جبدة مالشيشة مبعد قال : "أول ما بدات الحكاية ، في عهد عمر بن الخطاب رضي الله عنه ، فما جماعة كانو يقعدو عند قبر الرسول صلى الله عليه و سلم يذكرو ويقراو و تجيهم الزكاة . كثرو العباد و ما عادش يمشي يخدم حد و ما فماش جهاد.عادا سيدنا عمر هاج وقال السماء لا تمطر ذهب ولا فضة براو أخدمو . باش يوريك هوني إلي الحياة الدنيا مهمة و الحياة الأخرى مهمة . ما تحرك كان كي كثرو يعني لا إفراط و لا ... "سكت حبنا نكملو إحنا الكلمة .

قلنا الزوز فرد وقت : "تفريط "

ضحك و فرح و كمل : "تفرييييط ، باهي والزوايا كانت بلايص يتعلمو فيها القرآن و خرجو عباد صحاح تدافع على الدين و كل يوم يصير فيها ختم القرآن الكريم ما شاء الله و فيها قبر واحد حبو رب العالمين و كيما يقولو الناس يا ربي نسألك ب محبتك لرسولك نقولو نسألك بمحبتك لوليك كهو ، و زيد الملايكة تجي بحذا قبر الولي مادام يذكر فيها  إسم ربي "     

جاوبنتو متاع تتليف :"مممممممم ، واضح. "الزح ما صدق لربي قابلتها الطفلة موش وقتو جملة و كان بش نقوم تو ماتش(too much) حقرة . زاد الشوية و تكلم: "تصور يعني قداه من واحد يصرف ملاين عند طبة متاع النفس و يجي بحذانا مرة بركة نخرجولو الجن ولا السحر إلي فيه"هوني لعبلى على الوتر الحساس ، مسني في دوماني . لا عاد فيها شيماء لا هم يحزنون تلفتلو : "بابا ، التخميرة هذيكا حالة متاع هيستيريا ، راك متاع زاوية و تحضر في سولاميات ، فما قاعدة تقول إلي كي الإحساس يغلب الإدراك يغيب الوعي يعني الراقي -وعملت فازة بصوابعى -يحرك الخوف عند الحاظر حتى يدخل في هيستيريا و يولي يتصرف درة كيفاه. "

حرك فمو السيد وقالي مفجوع كلي بو مسلو واحد شرف بنتو: "الله الله الله الله الله ! يا ولدي شتقول الجن موجود و مذكور في القرآن و المس فما ؟ استهدى بالله يا ولدي ".

مازالت التخميرة ماخذتني و إلي نحبو الكل هو أني نطلعو غالط موش مهم يقتنع ولا لا : "الجنون موجودين و مذكورين أما بابا العزيز ، أسطورة المس موجودة من قبل. هيا شد عندك اليهود قبل حكاو عليها ، المسيح يحاربوه بصليب تلقى البابا يسخط في السيد بصليب و ما قاري عليه من الإنجيل و نحنا تعرف كيفاه ومبعد يسألو شنوا دينك ، الحكاية هاذي موروث ديني وكهو "          

تلفت حكالي حكايات مغامراتهم مع الجنون : "يا ولدي صارت معانا حكايات ماهي حكايات واحد كان والعياذ بالله لواطي و بعد الرقية رجع عادي ."

أنا شديت ضحكتي أما شيماء ما نجمتش تشد روحها : "ههههههههه سامحني عمي أما لحكاية تضحك هههههه تاخوش عليا"

سكت الراجل وكمل : "مرا ضيعت ذهب بنتها بعد كي حظر الجن قال كل شي. أنتي شخاصر إيجا أحظر و  شوف و أحكم  ". جاوبتو بكل ثقة : "ما  نستحقش ، نجم نفسر لقطة الأولى الراجل كثر عليه الكلام و فبرك الهدرة ، و تلقاه مازال لتوى على طبيعتو ماك تعرف الحجرة ما تذوب و ....  . الثاني فما ميموار إيناكسيسيبل المخ يسجل حاجات ما يفيقش بيهم الوعي و تلقاها سكيزفران ولا حاجة هكا ما شفتش الحالة قدامي أما إلي قلتو لكل عندو تفسير علمي منطقي بحت"

السيد دخل بعضو وقال :"لا لا لا أنتي حكايتك حكاية يا ولدي شفت بعينيا هذوما إلي باش ياكلهم الدود والتراب عباد تاكل قزاز و دخل في سيوفا في كروشها ويخرجو لباس عليهم شتفسر وريني"

عملت رشفة تاي بش نربح شوية وقت وجاوبتو : "باهي فما فرقة صوفية في سوريا اسمها النقشبندية و فما الرفاعية هاذوما مشاو لما أقوى  "

تلفت  هوا باش يستهزئ من كلامي : "شنوا صاروخ ؟"

ضحكت و قتلو : "موش لكا الدرجة أما ماترايوز ، وصلو يضربو في رواحهم بيه".

قعد هو مركز معايا وقالي:"أي ؟ كمل ."

جاوبتو : "باهي فما لقطة في  الإنترنات ورات إلي  الحكاية هذي غالطة، إلي يضرب روحو ، يضرب بحكاية غالطة كرتوش أبيض، حس بركة ،بعد يسرسب الدم  هاذي عينة ، مالا الباقي كيفاش وبعد يقلك سحر و ريق خزعبلات ممزوجة بالدين  "

حسيت إلي الشيخ طايرتلو في قلبو سب النهار إلي قابلني فيه  : "يا ولدي راو نحنى داوينا ناس ما ناس ، عندنا واحد بكوش و برقية ولا يتكلم ."

جاوبتو : "شوف ناس بكري قالو سيدي الحلفاوي خير مالطبيب إلي يداوي ، حسب معلوماتي يداويو على الفجعه ولا أنا غالط ؟" أكدلي الشيخ "صحيح، وهو كذالك "

كملت : "باهي تايم ايز ذو باست هيلر ، يعني بلوقت الصدمة تتمص موش ترجع 3 ولا 7 جمعات " خليت الشيخ يركز مع كلامي و بعد زدت قتلو: "مازلت نأكد إلي طب النفس فايتكم هههههه "

الشيخ حب يرد كلامي ما عندو حتى  قيمة : "مالا قبل ما يجي علم النفس  شكان فما ؟ نحنا ناس قدم راو هههه "

حسيت بثيقة في روحي وقلت خنعملهم : " العلة غادي ، قبل الناس أي حاجة موش معروفة يربطوها بسحر ولا جن رغم تقدم العلم وقتها والأسامي  السخوطات في العصور هذيكا و الأرجح و الله أعلم جات الحكاية هاذي من عند اليهود هاو علاه . "

ضحك الشيخ باستهزاء و قالي : "نورني يا دكتور ."

جاوبتو و كملت هدرتي : "الرسول  صلى الله عليه و سلم قبل ما طهبط سورة النور كان حكم  الزنا ماخذو من عند اليهود و هو الرجم  يعني ما دام ما فماش حاجات ملموسة في القرآن رجعو لتالي خرجنا حاجات من حضارات أخرى و نقول حضارات على خاطر الديانات القديمة محرفة ."

على كلامي هذا نتلفت نلقى شيماء تخزرلى مبهمة تالمون كيوت حبيت نقز عليها وقتها .

الشيخ ضحك ضحكة متاع أعجاب و قال : "برافو والله معلوماتك قيمة جدير بلاحترم أما إلي قلتو تحليل موش تأكيد يعني وجهت نظر ."

مولى القهوة حط غناية الهادي الجويني ليوم قالتلي زين الزين الغناية هاذي كنت نحطها كي نجي نقرا مقدمة بن خلدون خلاتنى نربط برشا خيوط .وليت جاوبتو : "بابا  الغالي ، أنا معجب برشا بابن خلدون ، فما حاجات ما نتفاهموش على خاطر الوقت تبدل أما أسمع شحكا : هو قال إلي السحر خدعة بصرية و فما المعجزة تجي للأنبياء و فما الكرمات تجي لأولياء الله . حكى على منظورو عند الشريعة الفلاسفة ... و زاد حكا على علم الطلامس و فسر كيفاه تصير والقوة الكل إلي هو قال إلي الطلامس ما يجيوش، حاجة غالطة ، وزيد  القوة الكل إلي هو ما جبدش على المس باش يفسرلك إلي هو حكى على السحر بالطريقة هاذي و ما جبدش على المس ؟"

جا الشيخ بش يتكلم ياخي قصيت عليه : "صحيح إلي أنا نمنش في اللحظة هاذي لا بسحر لا بجنون لا بشي ملأمور هاذى أما حتى كان موجودين راهم موش بلقوة إلي صايرة عندنا . تحب تعرس تمشي لعراف ما تحكيش مع إلي تحبو ولقوة والضحكة كي يجي يحكي معاها تحفيه و تبدا تعزز "

تلفتت لشيماء بش ما نخليهاش خارجة على الهدرة : "بيبي ، أنتي موش كيفهم راو "

ورجعت لشيخ : "يحب خدمة ، يمشي لعراف . بخلاف مشاكل إجتماعية كيما تحب توقع بين حماتها و راجلها . الحماة ولدها تبدل شوية تمشي تحل عليه كتاب و تبدا تتبلى ولدي ولدي . تصدق 6000 مليار تتدفع سنويا للمشعوذين النوومرو هذا لعباد إلي سألوهم و جاوبو و ما خفي كان أعظم  "

الشيخ عجبو كلامي و حب يأكد صحتو : "السعودية عاملة وزارة لسحر "

نحنا هكا و أذن العصر الشيخ تلفت يحي فينا : "يا أولادي ما أحلاها قعدة، ربي يحفظكم و يأنسكم ببعضكم ، وأنتي راك ماشي في ثنية باهية . تعرف ربي أول كلمة قالها شنوا ؟ قال أقرأ نشالله تونس تخرج عباد كيفك و خير منك . أنا نقوم بواجبي و ندعيلك تشد الثنية الحق خاطر هههههه ثنيتك موش ولا بد أما ربي يحترم الناس إلي تطلب العلم و تبربش هيا السلام  "

قعدت رجعت لشيماء نخزرلها خزرة متاع فرغلنا الجو ... وهي دزتنى : "واه حومة موش مشى الشيخ بش دور هكا راني موش نخبش ، وراس الحنينة نشلط"  

رجع الشيخ بعد ما خلص عاود سلم علينا : "أهوكا خلصتو في تايكوم ، و نشالله نشوفكم بحذنا ولا في ساعة سعيدة. "

شكرتو و فهمتو ، الحاجة الباهية إلي هو عمل بقوله تعالى "لا إكراه في الدين "سيبني على راحتي. أما ثنيتو هي الصحيحة ؟ صحيح منطقو دعوي ، صحيح كلامو عسل ، صحيح اختلفت معاه برشا و كنا نتسابقو موش نتناظرو وأبعد ما يكون على الحوار. أما شهدلي إلي أنا شديت معاه صحيح وكبشت. كان دل راو على قوت معلوماتي ولا ضعف الحجج متاعو . والحاجة الثانية إلي وصلهالي هي راو الباب ديما محلول كي تحضر ايجا ، أما نجي توا ؟

لا بش نتلها بشيماء !    

 

previous> 

<next