عم عبد الكريم

se lever sur son pied gauche  سمعتو بيها ؟ تعرفو شمعناها ؟  هي ذات مومنة كي تقوم و تعرف إلي أنتي بش تعدي نهار كي زبي نو ماتر وات . كان حالك هكا اليوم ، تحشالك وسع بالك ، تصير في أكبر العايلات .  

ليوم قمت فادد خلاقي في صباطي ، ستراس الميموار ، البروف ليه جمعتين قالي تو نجاوبك على الرابور وشي ، تعاركت مع الدار و زيد شيماء نطلب فيها ما تهزش . كيما يقولو كي يتحشالك كل شي يجي في نفس الوقت .   

وسائل النقل هي السبب الرئيسي في فشل الشعب التونسي مهنيا ودراسيا ، خرجت مالدار 8 ماشي للفاك باش ناخو  طرف مراجع توا 10 و مازلت مطيش في حومتي يا ولا حال فيك يا تونس والسلطات ما تجيبش بوادر إصلاح ولا إنجاز ولا حتى حل . ملي ولينا نبدلو في الوزراء على عجلة ولات المعادلة قداه تنجم تسرق قبل ما يطيروك . الدينار طاح بدل حكومة وبالطبيعة التغير لازمو مشاورات و كي يختارو وزير  اخر حاجة يشوفوها المستوى العلمي ، بالطبيعة مادام  معالي الوزير باش يحركو شكون من     تالي يعني قد ما تقعد  في الطاحونة قد ما حظوظك ترتفع في الظفر بحقيبة .      

كلامي غالط ؟ فما حاجتين ياكلو فيا من قبل : الأولى في السياحة ، تونس فيها بلايص ينيكو في الراس ما يعرفوها كان أمالي البلاصة هذيكا و كي تشوفها ما تصدقش إلي أنتي في تونس حكومات مشات ، حكومات جات و ما مسهم حد و ما دار بيهم حد يجيو وتلى ولا مراكز نقاهة ولا أي حاجة ياكلو منها الشهد . والثانية تابعة وزارة الثقافة والمحافظة على التراث : باهي أنا ما نفهمش في الأمور هاذي أما باش تحافظ على تراث شبي صغارنا ما يقراوش على حضارتنا الأمازغة ؟يجيو في المكتب يقولولك راو البربر هوما السكان الأصلين و تاقف غادي . باش تعرف تاريخك ولا هويتك يلزمك تفيق إلي هوما كذبو عليك في الصغرة وقالولك راك عربي ... بون كان قالو عندك أصول عربية نجم نفهم أما تنحي الجذور الأصلية و تمحقها ... نقطة استفهام كبيرة ... لحاسيلو كيما قلت تفيق بلكذبة متاع الصغرة مبعد تولي تفركس على جمعية توريك أصولك وعاداتك ، شبي ما قريناش اللغة الأمازيغية ؟ شبي ما عرفناش عاداتنا من عادات العرب ملعادات الأخرى ؟ يتسمى  تابع المحافظة على التراث  ولا أنا غالط  ؟

جات تكسي جماعي تسرسبت وطلعت بمعجزة  فما راجل في السبعين قاعد يفرغ في قلبو لشيفور : "يا ولدي ربي يعطيكم الوقت الطيب ، نصيحة لوجه ربي فلوسك أعمل بيها حاجة تصلح "

ضحك الشيفور وقالو : "ههههههههههههههههه تي حتى تجي لفلوس يا بابا  "

سألو الشيووبا: "معرس أنتي ولدي ؟ "

ضحك الشيفور : "لا بابا و حتى بنات الحلال ما فماش ، هاك تشوف المقطع والمحزوق و الشعر المجبود عاطي مسد و حتى لابسة فولارا ...خليني ساكت  "

قالو : "عندي ولدي توا 40 سنة خذا وحدة ليه 6 سنين ، قالك صغار ما نجيبش نحب نعيش . قتلو في طولك في عرضك يجعل منك شي ، النافع الله "

الشيفور تنهد ، تحسو حاب يقلو ولدك خلط عرس شوف همي أما جاوبو بمنطق اخر : "ربي يهديه وكهو "حاجة كلاسيك ، سامبل و تمشي 6 زيت .

الشيوبة كمل هدرتو : "تعرف شعامل ؟ مشى شرى برطمان صغير هاو يخلص فيه بالشوية و كل مرة في بلاد هو و مرتو . قتلو برا ابني أعمل دار هاك ترى في فلوسك ، كل مرة في بلاصة فلوسو تصرف فيها عل خرجات و للا مرتو ما حلتش فمها ما تحبش صغار ؟ ما تحبش دار تمد فيها ساقيها ؟ تي لربي لكريم خرجات خرجات ماك درت ، مرة ثنين يزي و كي جيت نحكي معاه  قالي ما عينا بدار و ما عينا بصغار و ركز على نا يعني بنت لحرام شربتلو مخو .حتى كي قتلو أعمل عمرة وشوف بيت ربي ما حبش قالي ما عيني  "  

الشيفور كرز شعل سيجارو و في مخو أبعد زبي هوا هاو يخدم و متهني و أنا شوف حالي مانيش خالط حتى بش نعرس  

تفكرت كان عندنا طفل في حومتنا بوه ما يخليهوش يخرج يلعب غرمو بلجو فديو (jeux-vidéo) خذالو أتاري و بعد بلاي و إكس بوكس و كان كي يرانا في الشارع يتشوحر و يرانا هماج و ولدو حاجة كبيرة .لحاجة لباهية في الكارما دور دور و ترجعلك ولدو ما مشاش كيما يحب في القراية و ولا يسأل فينا يلقاش خدمة لولدو و يعملنا ولدي طري موش متاع خدم كاسحة ...  براف كانك بش تجيب صغير انصحو خليه هوا يتحكم في حياتو   .

مازال الراجل يحكي قص عليه الشيفور : "ماهي مهنيتو وإلا لا ؟ فرحان معاها ؟ يطل ؟ خلاكم ناقصين حاجة ؟  "

الشايب جاوبو : "لا لحق يسأل ويطل حتى كي يقلي نخرجك ، ندورك نقلو لا ززي روحك . تتتت مكش فاهمني ، ولدي أنتي كي تجيب صغار بش تلقاهم في كبرك و كي تعمل دار تلقاها غطى لعمرك ... أما هوما الزوز ما عملو شي . من صغرتو ربيتو يستحفظ ... اهوكا وصل إلي لمهم زاد عليهم و عمل برطمان توا شعندو ؟ ما عندو شي  "

أنا نسمع فيه  تفكرت عم عبد الكريم ، ليا برشا ما طليتش عليه هوا تحشا تحشا ، هيا نيك أمها العشرة لاف . هبط مل تاكسي و مشيتلو لدار .  الراجل هذا ما يعرف طرف   خلاها وين ، كي كنا صغار كنا نتلمدو ولاد الجيران الكل و هو يقعد يعس علينا . كان عندو تأثير علينا أكثر من والدينا كي كبرت عرفت السر ، كان كي يقول لا يفسر علاش موش يخرف و يخوف ، كان الوحيد إلي ربح ثيقتنا ما كذبش علينا . موش معناها والدينا يكرهونا أما ناقصين خبرة ههههههه هاذي زادة كلمتو .

وقفت قدام الدار و ماابهاها ريحة ، خليط بين الكالتووس و الياسمين و الكمونية . أه يا ولا ريحة واقيلا غبت غبت و جيت في أحلى نهار . الحمدلله على نعمة التلهميق . نساء بكري عندهم في صوابعهم تاكل عظمة تلقى فيها بنا سبيسيال تشيخ و توصل حتى عينيك ادمع . علاش ؟ خاطر تستعمل أفاح بدا يتقطع اسمو الحب و واحد اخر اسمو الخبرة .  

دقيت الباب خرجت خالتي مليكة : "يا شو شكون ، عالسلامة ، عالسلامة فرحة ما فيهاش ندامة . وينك يا طفل لا تسأل لا تتكلم وووه سمالله العظيم قطعتنا ؟  "

جاوبتها نسل فيها : "هههههه ماك تعرف القراية تاكلك وقتك و حتى النوم ساعات تنقبهوولنا .  أما هاي هانت قريب نكمل "

شدتني  يدي و قالت : "أسمعني حصانك جراي ، عاملة كمونية تاكل صوابعك وراها . كان ما تقعدش للفطور راني نتغشش "

هذا إلي بيك ، جاوبتها : "هههههه حاضر ، تو نقعد "

دخلتنى و عبارة جاتها شخصية معروفة : "عبد الكريم ! يا عبد الكريم ! شو شكون نلقى "

نلقى عم عبد الكريم كيما عادتو ، الراجل إلي مكبش في حاجات و مواكب العصر في حاجات . مثال ملحاجات إلي ما سلمش فيهم حبو لموسيقى القديمة  ديجا دخلت نسمع في رولينغ ستونز . في صغرتو حظر لحفلات على عجلة بلاك ساباث ، كيس ، أسي ديسي حتى حفلة كوين في ومبلي عام 86 كان غادي . نلقاه لاهي بلجردا خرجلى ملحوظ هازز مسحة ورعشني بيها : "يا واطي ما طلش "

دخلت خالتي مليكة : "وووه سيب الطفل "

ضحك عم عبد الكريم وبدا يسأل : "شنحوالك ، شنحوال داركم ؟ شفما جديد ؟ "

جاوبتو : "همممممم ، موش حاجة كبيرة ، هان... "

قص عليا : "لحظة نغسل يديا ، اهايكا القهوة ، السكر ، الزهر ، منك لززوة "

خذيت راحتي عالاخر ، مشيت ديراكت للموزيكا نشوف بلاي ليست حتى جا عم عبد الكريم قالي : "شقولك في جوي ؟ أيا أقعد وأبدا احكيلي "

تنهدت و قتلو : "الترانسبور وما أدراك مل ترانسبور "

ضحك و جاوب يحطم فيا :"في فرانسا قاعدين يخمو يعملو قانون باش الخدام يخلص سوايع الترنسبور مع سوايع الخدمة ونحنا في بلد الأمن والأمان نخدمو بين 7 و 9 سوايع في النهار ، زيد ساعتين فطور و 4 سوايع ترونسبور ... وبخلاف القصاصات يعني أسكلفاج فاحش "

قعدت مبهم نحب نشوفو وين يحب يوصل : "مالا نبطلو الخدم ؟ شنوا الحل ؟"

حرك راسو شوية و جاوبني : "موش نبطلو الخدم خاطر تاقف الدنيا ، أما أنا ضد أنك تخدم كي الحيوان خاطر بش تعمل دار تكمل تخلصها في 60 و بعد تتلها بيها و تكذب على الناس و روحك و تقول عملت افار  "

قعدت باهت و جاوبتو كإنسان داخل في حيط : "ما فهمت شي ، شتحكي ؟ "

بدا يفسرلي : "شوف مكثر العايلات يخمو نفس الطريقة ، تخدم ، تاخوو شهرية ، الدولة تاخو ، الديون تاخو مبعد تمد شطرها لصغار يقعدلك طرف فلوس بش تصرف بيهم على خدمتك ... شوية ترنسبور على شوية ماكلة توفى الشهرية توصل تقوم في الليل خايف مل فاتورة ولا مل قرض . هذا الكل يسخايل زيادة في الشهرية تنجم تحل المشاكل الكل   "

عم عبد الكريم يحكي في كلام قوي صحيح ملي عرفتو ، عرفتو كرزة أما كيفاه عرف هذا :

"عم عبد الكريم ، منين ليك هذا الكل ؟"

ضحك ، عندو ضحكة متاع تقوحيب :"شوف راني كاريار في كوكب الأرض ، عاشرت برشا ناس . الأزياتيك ، الأمريكاني ، الطلياني ، الألماني برشا دونك موش على هاذي و وحلت . شوف قداش من واحد بش يبوسلي ساقيا على خاطر ستاج ، قداش من لاتر موتيفاسيون تجيني فيها تلحيس بحت ، أمان كيفاه بش نخدمو ولا بش ندخلو لشريكة وهو ما يعرش يقدم روحو ، قداه من واحد يجي يفلم قدامي يقلي ولدي دخلتو يقرا بلفلوس  كيف نقلو علمو كيفاه يخدم فلووسو يقلي خلي يقرى تو يجيبهم الفلوس "

سكت خاطر كلامو داخل في الصميم و زاد كمل كلامو : "كل يوم ، كل لحظة تجيك فرصة متاع افار أما نحنا تربينا نشدو الحيوط . نفركسو على ثنية سالمة  ما فيهاش مخاطر ، حتى إلي يحب يخدم فلوسو يشوف في تجارب مستهلكة ما فماش تجديد في البزنس بالصفة إلي نراوها في الكوجينة ولا الموزيكة . نعرف راني كثرتلها شوية خاطر سلكتها في حياتي أما نحب الناس ما تحصرش روحها تريسكى شوية تنجم حتى في بلاصة الشهرية تخلصلك دار الماء الضو الكرهبة ... تنجم تعمل مشروع صغرون.بون الحل هذا نراه أسهل من أنك تعيش بمليون و تصرف منو هذا الكل   "

باقي ما فهمتش : "باهي عم عبد الكريم ، راهو وقت مش وقتو كيفاش بش توصل تعمل حاجة البلاد مسكرة "

جاوب يأكدلى : "باهي أنا عندي برانسيب تخدم لروحك ب100 دينار خير من خدمة تحت شكون ب 500 دينار على خاطر على روحك بش تعمل 1000 % أما على غيرك هاك تشوف في الناس تلقاه الصباح بلكرهبة تقول بش ننهضو بلبلاد، تقول نحنا اليابان الجديدة ، يوصل ، يبونتي ، يحط دبشو ، يجري للقهوة يكحل على البناوية "

كلامو صحيح رغم إلي مانيش مقتنع بلكلام متاعو الكل ، بش تعمل مشروع ماهوش ساهل ، موش صباح الخير نحب نحل شريكة و حتى كان ساهلة الحكاية لازمها لهوة ، هذاكا علاش قالي كي تبدا تخدم وحدك تعطي أكثر ملي عندك .    

زادة كي حكى على المشاريع كلامو صحيح قبل فما تاكسيفون ، فما كاساتات توا فما يوتيوبر (youtubeur) فما بروجرامور        (programmeur)فما خدم دخل منهم الذهب نحنا نراو الدنيا بخزرة أخرى كل وقت و وقتو .كل واحد و فاش باهي كل واحد و خبرتو .

ضحكت و قتلو : "شبي ما نسمعوش الكلام هذا ديما ؟"

جاوبني و قال إلي نحب نسمعو الكل : "نحنا ستانسنا نحكمو على العباد من منظرهم "

تكلمت على أساس نتبع فيه : "قاعدة 10 ثواني "

كمل كلامو : "بضبط ، 10 ثواني الأولى تخليك تحكم على عبد من لبستو مل كلمات الأولى إلي يخرجهم ... كان عجبك و رتحتلو تكمل معاه كان لا تلقاها صعيبة بش تتفاهمو بعد .  "

عملت لقطة بوجهي متاع أنا نتفاهم مع الناس الكل ، ديراكة جاوبني : "هههههه تو كي نجيبلك جماعة ثامر حسني ولا جماعة أنشرها ولك الأجر تو نشوفوك"

خلاني ما ضحكت و كمل كلامو : "باهي ، كي تبلوكى عبد هكا بش تكون مسكر و ما تراش الفرص إلي يجيو دونك بش تزيد تتسكر . ما نحبش نحكي على الدين أما هذاكا شصاير ، نتسكرو على هندوس والبوذين ، بعد نتلفو المسيح و اليهود و نزيدو نسكرو رواحنا و نطردو الشيعة و بعد نعجنو بعضنا جرابا  صافي هههههه هوني سنة صافي "

نحنا هكا و جات الكمونية قالي عم عبد الكريم :"هيا نكملك الهدرة في الطاولة ."   

قعدنا و كمل : "من أكثر الحكايات إلي عجبتني ، فما واحد لبناني حب يجيب ألمان يزرعو الشعير في لبنان . طلبو منو الألمان يبعثلهم طرف تراب يحلوه . مبعد رجعولو قالو تراب ما يساعدش يخرج شعير خايب . السيد هذا تبنى المشروع و صنع البيرة وحدو مشى المشروع و عطى ثمارو بدا يصدر فيه لبرة . بعث لجماعة طرف بطبيعة و رجعو و قالو راو كليتي خير و ولاو يتعاملو معاه . كي سألوه قالولو مسلم مش حرام ؟ قاللهم ما حبوش ياخذو على خاطر تراب مش على خاطر ديني . يعني بش نجح نحى البلوكجات الكل      "

القعدة مع عم عبد الكريم ما تووفاش ، كل ما نمشي نتعلم حاجة جديدة ، الراجل قد ما تعاشرو و عندو ما يعلمك . ساعة من زمان خذيت منها روح الزبدة صحيح فما حاجاة مأ اقتنعتش أما زادني .   

   

   

previous> 

<next