اليومي

"أيا حوت حوت ، هاي تريليا" ، "خبز بايت خبز بايت " ، زيدهم شوية حداد شوية نجار و حس كيران . هذي هي ريفاي متاعي . نفيق مرهوج ، ندور على الجنب لاخر أما شي ... النافع ربي . نلقى السيدة الوالدة حالة الراديون، حاجة باهية بش نعرف تقريبا الوقت كان فما جعفور راو بكري كان كوثر الباردي راو النهار راح .

ناس بكري قالو "إلي ضاع صباحو ضاع رباحو " في تونس عمرنا ضايع جات على صباح ؟ يلا ... حاجة ربي شبش  نعملو . قمت مالفرش مشيت  ديراكت حليت أحسن حاجة خرجت للبشرية ... موسيقى المعدن برشا يسخايلونا نعبدو في الشيطان لحقيقة هذي تضحك أما الحمدللله لعبد بدات تفهم إلي الفكرة هذي حمقاء .

أحلى شعور عالصباح تشرب قهوتك مرتاح وأنتي موحل الفن تعمل 66 كيف تحل معاها الأخبار ... في تونس هذي هي المصدر الوحيد متاع الضحك، شد عندك المسلسلات ما تجي كان في رمضان و السقال هل العمل المقدم ناجح ؟ و شعبنا بطبيعتو شعب فشلام مستهلك يعني ما تستناش منو  باش يعمل حاجة كبيرة وإلا يفاجئك بحاجة . أقصى حاجة  تنجم تصير  مرة وإلا زوز فما  .     شكون يصنع حاجة وإلا ياخو ديبلوم في حاجة ويجيه الإعلام كي المرى إلي تهني في نافسة     

و يولي ولد تونس البار وما كيفوش . و تلقى الإعلام عادي ينفخ في الهدرة . ما عندنا ما نلومو عليه ما دامو هو بيدو ينش  في الذبان . كملت مل  أخبار حليت فايسبوكي . أنا عندي برشا علاقات إجتماعية ، كل صديق واش يحط في حيطو ، هذه حاجة باهية نعتبرها نمن بفلسفة إلي تقلك أعرف برشا ناس وخلت برشا أنواع بش طخ فكرة كبيرة عالمجتمعات  .

كي حليت نلقى على كل لون يا كريمة ، من أنشرها ولك الأجر للحمقى إلي يصدقوا في كل شي ، تكسر عل جيه الأخرى تلقى الفشلامة كل يوم بتي داج   و لاخر في بواتا هو موحل طفلة  في حجرو  لاخر في قهوة درا  وين النصر ولا لعوينة ، طفلة تقحف في جامات وزعمة زعمة بوزيتيف فيبس (positif vibes) ولخرى   تلعلوج ى ولد لحلال كل مرة ماكلة جديدة ولا تحط حاجات من نوع "الفتاة الصالحة ، الزوجة المثالية" ... الغريب في الأمر ماركيتينج ولد قحبة كيفاه يوصلو يبيعو تصويرتهم بالطريقة هذيكا.         

كملنا من الفايسبوك مشيت كيما أندادي الكل نعمل دوش ، وبدوش يعني لا بد من خرطة ... كيما قالو أولاد كلاسي في كولاج "خرطة الصباح تعدي النهار مرتاح " ولا "خرطة المساند الرسمي للعزوبية" . كملت ، خرجت ، ما فما حد في الدار ، قلت ندور عريان نحس بحيوانيتي وما أحلاها السيجارة وقتها وأنتي عريان .

توا وقيت واحد يحظر روحو باش يخرج ، كونك معدني باش توصل تختار مريولك متاع مجموعتك المفضلة ياخو أكثر وقت من أنو  طفلة توصل تختار روبة . هل المجموعة إلي في المريول خرجو ألبوم ،  المجموعة إلي مركز معاها ... هذا حسبنا إلي المراول نظاف وطبعا السروال يا أزرق يا أكحل . حطيت     بيسي في الساك وحلت الفن في التليفون سكرت الدار وقصدت ربي . ماخيرش من أنك تحط ايرون مايدن(iron maiden) في الصباح ملا صلوات ، ملا ريتم دنيا وحدهم .   

كونك بطال تونسي يعني في مغلب الحالات :عايش على ظهر والديك تاخو في المصروف من عندهم و حافظ كلمتين "تونس ما فيهاش مستقبل، نحب نهج " ولا "ما نخدمش في نظام رأس مالي انتهازي " في كلا الحالات سبة باش ما يسبك في أي خدمة . حاجة عادية البطال التونسي عيش عيشة الأمراء الصباح قهوة   و العشية قهوة و في الليل خرجا ولا بوتا ولا يروح يكونكتي . عيشة فل على كل النواحي .  

وصلت لسنتر فيل (centre ville) قاعد نمشي لشارع بورقيبة على ثنيت شارع قرطاج ، والطلاب يعرضو فيا كي زومبي ""حويجة لربي " ، "أعطيني حق خبزة  " وما تيسر من عبارات التقحيف المزعجة . أنا يا نتلف يا نقول ربي ينوب و في قلبي ... ههههههه  .... برا نيك الأم متاع أمك ... تي برا أبعد زبي ... راك كرزة أش تحشي فيه ... و ما تيسر من القاموس الشارعي .

في الثنية  العباد لابسة سورية برشكة الشهيرة (حمرا وكحل كاروات) و البنات بسراول مقطعة في الركايب ولا مدينات مستورين أما لبسة محزوقة وكيما  يقول مقحوط بن طفار(شخصية وهمية لا تمد للواقع بصلة) "مدينة في الفرش حنينة" و لولاد فما إلي محجم راسو عل اجناب ومخلي شعشوطة الفوق    ولا ملمد شعرو بطرف شكال وفما إلي أنا كيفهم يحجم راسو صلعة ويهيج لحية ... آه ما أحلاها حجامة تحسسني برجوليتي وتحسسني إلي شخصيتي قوية  ... حكاية اللوك عملت صراع  أجيال كبير ، والدينا موش عاجبهم شي في منظرنا علاش ؟ تتعدد الأحتملات والصحيح ما فمش شكون من جيش العدو  جا و صارحنا. أما فما حاجات محال تتبدل ... التبزنيس و التكحيل ، تتبدل الأجيال ، تبدل اللغات يتبدل البيك أب لاينز (pick up lines ) يقعد الكونسابة نفسو . نمشي في الشارع ، قدامي قطوس ... عادية ، لابسة مريات شمس ،  شعر محلول كوب كاري (coupe carré) لابسة سورية برشكة الشهيرة محلولة تحتها  مريول نيرفانا سروال دجين و كونفارس (converse) . عندها شوية ماتريال خارج ترمة و صدر دازين . ريتها فين برشلونة خذيت النظرة  الأولى،  المطولة ، الحلال  شرعا متاعي مبعد  قعدت مركز مع البزناسة  و إلي يكحلوا  نشيخ عليهم رغم إلي أنا واحد منهم : الجداق الطايح ، الريقة السايلة ، إلي كرومتو باش تتفصع ، إلي عدو باش يلبس  الحيط - على ذكر الحيط وأنا في الكولاج قريت عند بروفة عربية مزيانة برشا ، عامتها نقراو مل 4 حتى ل 6  . نهارتها خرج زميلها وخرج تلامذتو  قبلنا و برا عاد وعينيه تلعب وصعد مركز ويقلو الحيط إيجا لنا ذوق البنة يلبس الحيط - و فما في البزناسا جماعة "بسسسسة " و " يا حوتة شفما لوطا " و فما شكون "شبي اللوز منبوز " و "شبي الفراز " و ما تيسر من كومبيل الجردا و السنا خرجة "هبليه " عاد تلقى "هبليه ببرشكة  "ولا "هبليه بالبزول "  و  شد عندك أنتي و الكرياتيفيتي (créativité) متاع البزناس

لقدام تلقى جماعة أشري بيس(puce) بدينار تلقى 3 لاف وكان تبدى معاك لحيرة يزيدو يطمبشو ، ما يتلامش عليهم ... خبزة.

وصلت لشارع الحبيب بورقيبة وين البالماريوم زح إلي تلقاه واقف هوني يا مشكل (مرندف)وإلا يستنى في شكون ... قبل ما يحل هو كان بابا يحكيلي الناس كانو  يتقابلو 4 ونص قدام المسرح زمن بو عنبة لا بورتابل لا إنترنات ... يلا كل وقت و وقتو .   تلفت على اليسار نلقى ميترو متعدي . بدات غنايتي   المفضلة فير أوف ذو دارك(fear of the dark) وأنا مشيت .

شهر أفريل ، صباح الخير تونس ، في أرض الثورة والربيع العربي والزبل المطيشة ، الوقت يلعب معاك برشا خدع ، ساعات يفرحك و يخليك تضحك من زكك و ساعات  يبكيك و يحشيهالك من حيث لا تحتسب . العمر يجري بيا وأنا مانيش فايق، شعري بدا يطيح وشطر أحلامي الطفولية بداو يندثرو (نكون فنان ، نكون كاوارجي ، نكون ممثل ... )أمي و بابا وقفولي فيهم كيما وقف بو هتلر في ثنيت ولدو . حبوني نطلع مهندس ولا طبيب وإلا حاجة تشرف البلاد أما في الواقع جرد كاغت (شهادة)مازلت ما بليتهاش و شربت ماها . أسمي مهدي نقرى ماجستير علم نفس ونخدم صحافي فريلانسر والسنا قاعد نحضر في رسالة تخرجي                   

 

     

<next