هيا تجي تبرف ؟

كانك ميتالهد نحب نسألك : قداش من مرة يتشوحرولك في الشارع ؟ قداه من مرة تسمع كلمة يا هردوس ؟ جاكشى مرة واحد قالك مرة تعبد الشيطان ؟ …

باهي بش نحكيلكم شصارلي سنين لتالي : أول ما وليت ميتالهد جاني صاحبي يحكي بكل فخرة : "في بالك نجم نقتلك ؟" بهمت "علاش شفما ؟"

مازال يحكي بكل ثقة في النفس : "خاطرك هردوس و تعبد في الشيطان " ما تشليتش خاطر إلي سبقوني حذروني أما كانت وات ذو فاك أكلي بضبط و الأمر من هذا و دنو قال : "من خالط قوما صار منهم ... هذا إلي خلاه يقيم عليا الحد" . برا يا زمان و ايجا يا زمان الإنترنات في كل مكان . حسيت إلي التوانسة ولاو يفرقو بين و بين ولا أنا هذية نظرتي ... شتقولو ؟      

لبارح كلمني واحد حاشتو بيا في خدمة ، حسب ما فهمت عندو قروب و كلموعليا صاحبي أسامة . عطاني رونديفو في الموكايشي . واحد مع الموزيكا ما يوخرهاش ، قلت نمشي نقابلو نشوف ماه وين يصب .القهوة هاذي تعجبني من أحسن القهاوي إلي تركش فيها مع صحابك ،براسك الناس إلي فيها يعرفو بعضهم الكل، إلي يقعدو فيها أغلب أعمارهم بين 18 و 22 . موزيكا إلي يحطوها بحبوحة و ديكور محلاه عجبوني تصاور عباد عل حيوط واللون الأخضر زاد عطاها روح جديدة . تقدم وين الكنتوار تلقاه هالوين للعام 12 ديكور يعمل 66 كيف .   

دخلت نلقى واحد مركز معايا كان قاعد في أول طاولة يتكيف في الدخان بلهفة عبارة على واحد جوععتو نهارين و سيبتو على صحن مشوي . عامل شعرو  بلي ماش(les mèches) ما نجمتش نتفكر وجهو أما تفكرت ريحتو ... كي تضرب في خشمك تلعب عليك الدوخة .  

فما زوز قاعدين بحذا الشباك طفل فوتوغراف و طفلة بايبي فايس ، الطفل كلاس لين خرى فيه  من هيتو ولبستو  ثقفوة من جماعة قهوتي و سيجارتي ... باز وأنتي تقرى قاعد تتفكر في واحد هكا.  والطفلة كل مرة تبوزي وتقلو صورني, برجولية زين أكاكا يستاهل سو كيوت وهو يقوللها حاضر و ساعات ينصحها تبدل في البوز شوية و ساعات يوخر هو باش ياخو أنونجل (angle) مزيان فماشى ما يركحها . أكثر شماتة تصير توا يدخل واحد من أصحابو النبارة "وا ... ايييييي ... ملا زبور ... ما تضويش ... " ولا الكلمة الشهيرة "حالة معاك حالة " .

قعدت في طاولة ، مقابلني 3 أولاد واحد منهم عاش في الخليج وتوى رجع ديفينيتيف لتونس. تلفت واحد منهم : "أه شيخ عمر ، احكيلنا على ايمات الخليج ، كيفاه عامل غادي ؟ "

عمر "الحياة دين في السعودية ، عديت 16 سنة غادي ، نقرى في ليسي فيه عائلات الأمراء ، 4 متيارات متاع دين ، الملك عامل معانا كان الباهي حفظه الله"

خزرو الزوز لبعضهم و حبو يضحكو أما حشمو.نجم نفهم علاش ، قداش من واحد منا قبل الثورة كنا ما نحلو كان تونس 7 و ما عندناش ثقافتة سياسية و زيد فوق من هذا البخل ماكلنا ،ما عندناش ثقافة تكسير الجعب للبحث على المعلومة ...    

في هاك اللحظة واحد منهم تليفونو نوقز ، غناية والك ويذ مي إن هال(walk with me in hel) .عمر شنع و تخمر : "تعبدأو في الشيطان ، أستغفر الله ، يا ولادي ما تخافوش من ربي ؟  "

شطر القهوة بدات تتلفت،أكا إلي ريحتو ناتنا هز راسو مل تلفون و بدا يفسص فيهم : "زبي ؟ مازالو منهم ؟ ههههه "   إلي قالوعمر عبارة على ستاند أب كوميدي . تلفت واحد منهم هداه "يزي صلي على مولاك بش تفضحنا"

عمر قعد يخزر ثواني  يشد روحو : "ما سمعتش الشيخ ممدوح الحربي  شيحكي ؟   "

تبسم صديقو و قالو" أحنا نتبعو الشيخ ليمي رحمه الله ، الشيخ ديو رحمه الله ، الشيخ كيري كينج حفظه الله أما هذا شي ... أما أحكي ميسالش  "   

تلفت عمر و بدا يخدم : "قال عليكم كل خير ، تبارك الله ، تعبدو في الشيطان ، تقدسولو و تقربولو بأغاني هستيرية و ضوضاء و صوت خنازير و تتعاطاو مخدرات وتقربو للشيطان بالجنس."

هو يحكي و أنا نتفكر في حاجات ، يقول في حجات صحاح أما ماعندهم حتى علاقة بالواقع  فما طوائف يهودية كانت تتعبد بالجنس ، يشوفوه كباعث للحياة هذا صحيح 100% أما نحنا نشوفو فيه فرهد العصفور …  خنكمل نشوف نقشاتو    

" ديجىا ليفي هو إلي  أسس كل شي يقلك الله ظلم إبليس وهو من  أسس الكنيسة الشيطانية وعبدة الشياطين إلي تبعو فيهم يستمتعو بكل ما حرمته الأديان و يمارسو السحر غادي و ليفي كتبتو لكل على شيطان العديد من المؤلفات عن الشياطين و الديانة إلي جابها لعنة الله عليه .و الكلهم يقردو ديانات النصرانية الإسلام واليهودية وخاصة الإسلام"

معلوماتو  صحيحة أما ... الإسلام ؟ ديجا هو عامل صليب مقلوب و كنيسة مش جامع يعني نحب نعرف كيفاه خاصة الإسلام بركة  كمل يا بابا.

" وهوما يلبسو بللاكحل على خاطر الشيطان يحب اللون هذاكا عكس الله ورسوله ، ورسول الله صل الله عليه و سلم يلبس ديما بلأبيض . و يمشيو ديما للقبور يشتحو غادي وينبشو القبور ، ويذبحو الصغار و يشربو البول و خاصة يعفسو على الكتب السماويةيحطوهم  في صبابتهم و في الحفلات الصاخبة و يشربو دم القطاطس"

زح زعمة فيبالو بدبوزة الدم إلي مكفنها ؟ وتوا شارة العقاب علاه كحلة مادام لون هذاكا خايب أما لابد من التثبت في حذاء ديو .صباط ليمي الكلو بريزرفاتيفات و فياجرا باز .  

"و من أهم الشروط ..."      

ضحك صاحبو وعيط للي يتكلم في التليفون  : "يا أيمن إيجىا هذي تهمك برشا ، كمل عمر زوز تصاور و نسخة من بطاقة التعريف ؟ "   

بهت عمر دوح راسو وقالو : "أضحك أضحك ... أهم الشروط ما يدوشش ". على كلمتو هذيكا تلفتت للي ريحتو ناتنة و في قلبي حلبتلك يا ولد القحبة .

كمل عمر حديثو و أيمن و صديقو يخزرو ويتبسمو "   وفما حاجة أخرى ما يستعرفوش بالدولة يقولو إلي الحاكم ظالم ونحنا خير ماغيرو  وهذا خروج على ولي الأمر  وتحريض على الانقلاب كان جاو في المملكة راو تضربت عناقهم و نحنا نتفرجو و نستحلاو فيهم  "

صحيح ، فما ما لا يحصى ولا يعد ملغناء يدعو للأنارشيزم سيستم أوف أو داون (System Of A Down) ،  أرش أنمي (Arch Enemy) ، ليمي متاع موتور هاد وغيرهم هذا موش غريب على أحسن نوع متاع موسيقى خرج للبشرية كاميكاز في مخاخنا هههههه

تلفت أيمن وقال : "باهي كي لمت علينا نجم ندافعو على روحنا ؟  "

مهمه عمرو ولا  يسل فيها بأمور رجلة : "يا ولدي راك خويا ننصح فيك لوجه الله إلي تعمل فيه يهزك لهاوية وكيما قال الرسول : "من خالط قوما صار منهم "وأنتي نعرفك موش متاع الشي هذا "

ضحك وبدا يفسر : " باهي الميتال قبل كل شي نوع متاع موسيقى فما شكون يقول أصلو مل بلوز ، فما شكون يقول موسيقى هارد الروك  وكل وحدة ما تمنعش صحة الأخرى . باهي لا اله إلا الله محمد رسول الله بدا الميتال يظهر عام 1960عن طريق ... "

قص عليه عمر : "هاك جيت وحدك عام 1960 مع ليفي "

جاوبو  أيمن : "أمان ، بجاه ربي من قبيلة تحكي و تهر وتهز و تنفض وتقول في حكايات تضحك. هوما أفكاري عاملين شكشوكة خليني نحكي و يا ربيشي تفهمني "

هذيكا هي أداب الحديث في العالم العربي وفي الخليج خاصة لا بقاء إلا لفكرة الملك ماذافاكا.

سكت عمر و كمل أيمن : "باهي لغناية إلي بدات بيها جذور المعدن هي بورن تو بي وايلد متاع ستيبنوولف (Steppenwolf   Born to be Wild) فيها كل ما يتوفر من مستلزمات المعدن جيتار ساتوري(saturée) ، خدمة سامبل و أول مرة استعملو كلمة هيفي ميتال "

باش يزيد يأكد لكلام متاعو، صاحبو لاخر خذا الكلمة   "زاد فما جيمي هندريكس و بيتلز حضرو لأرضية باش يظهر أحسن و أفضل نوع متاع موسيقى عرفو التاريخ  "

كمل أيمن الكلام متاعو : "و أول ظهور لناس تلعب الميتال أوفيسيالمون هوما بلاك ساباث و ما أدراك هاها !!! . هوما أول من عمل حاجة أوفيسيال متاع ميتال رغم إلي لخرين يلعبو ستيل اخر. المعادلة إلي قالها أوزي المغني متاعهم كانت هكا    ملي كانو يتفرجو في فيلم رعب خنعملو موسيقى تخوف و بسبب بلاك ساباث جاو برشا جماعة أخرين عاندوهم و جا مبعد موش كان إلي قلتهم أنتي بركة جا الميتال سنفونيك ، ثراش ميتال البرووجريسيف و الفولك إلي نحبو أنا شخصيا ... تي زب حتى الميتال اوريونتال فما .

ميراث من تونس  اينترنام (Aeternam) كندي و مغنيهم مصري و غيرهم لعبو الميتال بلمسة شرقية . وليومنا هذا للحظة هاذي فما ناس تنسبيرى من بلاك ساباث  ويعتبروهم مرجع كبير من المراجع الموسيقية  "

جبد صاحبو الميتال من منظور أخر : "أنا الميتال عندي نمط حياة ."

عمرسكت، خزرة غريبة شوية فيها أسف على غش على ندم : "إن صلاتي ونسكي ومحياي ومماتي للّه رب العالمين و أنتي تقلي الميتال منهج حياة ؟ يا أخ! يا أخ! أتقي الله ، تو ربي عاطيك سنة مباركة بإذن الله كان تبعتها ما تضيعش ، وأنتي ماشي تشوف في حاجة أخرى متاع قوم في ضلالة ؟ الله يهديك ! الله يهديك "

خزرلو غمزو وجاوبو : "يا معلم بشوية شعلت فيا فتيلة زيت  ههههههه تحس دخان خارج من راسك ولعرق بدا عبي جبينك  وحيدة وحيدة أشرب كاس ماء"

جا أيمن ينبر يعاند في فيصل القاسم يعمل "يا جماعة ! يا جماعة ! رجاء سيدي "

كمل الطفل كلام :"مادام موسيقتنا ماهياش موجودة في شانات الغناء  ، باي ذو واي حتى في الغرب كيف كيف موش كان في العالم العربي. تنجم تكلاسيها موسيقى هذي اندرجراوند (underground) وتلقى لي فانز(les fans) جابدين  رواحهم مل مجتمع ما يتفرجوش في دليلك ملك ولا عندي ما نقلك ،راهو عادي تلقى ميتالهدز يلبس بل ألوان ولا لوك موظف أما أن جينيرالمون الميتالهدز ما يحبوش يدخلو في المجتمع احتجاجا على ثقافة كيما سماوها  الكلاسيكية"

قص عليه عمر : "كيفاه كلاسيكية ؟ "

 جاوبو : "الدنيا موش تعرس ، تشد الدار ، تجيب صغار و تقعد . عمرها ما كانت باش تخدم و تعيش عبد و خاصة موش باش يحكم فيا واحد يحكي بإسم الدين و يقلي ضربة ضربتين نحنا نجيبو الفتوى وأنتي طبق."

هههههه ضحكت عليه حسيتو ديما يبربش فيه يا معلم سايس راهو عايش في مجتمع ما يخمم كان هكا مجتمع كشطة واربط بأتم معنى الكلمة   

"فما عباد يفضلو في بلاسط يسهرو في بواتا فيها ابن أبي فياس وأدس ادس يمشي يديفوولي في كونسير متاع ميتال أما الله غالب في تونس حالتنا متعبة أصل لا كنسارات لا فستيفالات . ويفضل يركش يكتشف حضارت الفيكينج(viking) مع أمون امارث خير ملي يسمع قصت حب فاشلة متاع ايليسا وأخيرا حوايجنا ماهيش من سيليو ولا زارا أما مل حفصية ولا الزهرة  "

كمل أيمن الفكرة : "المواضيع إلي يطرحها الميتال مكثر الوقت منبوذة من المجتمع وخاصة من رجال الدين و زيد الكوميتي متاعنا صغيرة قدام شعب كامل نتحسبو على أطراف الصوابع بلغة أخرى مخلوقات غريبة في عينين الناس وفما واحد صحيبي الله يرحمو اسمو نيتشا قال المجتمع حل عينيه على أنهار ملسموم موروثة وهو يبدا في قطيع ما يعرف شي مغمض إلي يخرج شوية على القطيع هذا يردوه مهبول شكون حط القواعد هذوما ؟ شكون قال إلي الشي هذا صحيح ؟ الله أعلم  "

عمر يأكد في كلامو  :"مالا كلامي صحيح الميتال حاجة عاملها الشيطان باش يحارب الديانات موش كان الإسلام ... لا حول ولا قوة إلا بالله . اللهم لا تحملني ما لا طاقة لي به  "

قص عليه صاحبهم يوضح : "يا ولدي ما فماش منها الميتال هو ثقافة شوك(choc) للمجتمع مثال بلاك ساباث يعني لمة متاع سحرة نساء .بدات الثقافة الثورية الضاربة تبربش في الكنيسة والناس المحافظين و هذا ما يأكدش إلي واحد فيهم ساتانيك وكيما البوكيمونات المسلمة متاعنا هجوم التكفير وهو يعيط حرااااااااااام ، كفر ، جهنم وبئس المصير البوكيمونات متاع الكنيسة عندهم هجوم الساتانيزم ، يغني لمجد الشيطان؟ ساتانيك يلبس مريول فيه بنتاكل ؟ ساتانيك يسب في ربي ؟ ساتانيك تقلب الغناية تلقى ميساج يمجد الشيطان ؟ ساتانيك والله يضحك ما فما شي صحيح نسمعوهم نبداو نتبربصو ضحك . "

جاوب عمر مبهم : "تحب تفسرلي إلي شيخ قاري و معدي 30 سنة ولا أكثر بين الحديث والسنة غالط ؟ نقب عمرو الكل بين صحيح البخاري ومسلم و القرآن .. غالط ؟  "

شكب عليه صاحبو : "شتقول على البابا مالا متاع النصارى ؟ هاو معدي عمرو الكل في الغلط . شوف فما كعبات  ساتانيك صحاح أما الحالات هذي نادرة وتكاد تكون منعدمة أما كيما العادة واحد يتعدى على الناس الكل ، نرجع بيك للساتانيزم إلي لعباد تستعمل فيه كديكور كيما سلاير عندهم غناية جاد هايتس  أس أول (god hates us all) أما توم أرايا مغني الجروب كاتوليك ظال وقال إلي ربي يحبنا أما الغناية ما تنجم تكون كان أكاكا وزيد كري الجيتاريست قال إلي هو ضد الدين على خاطر يغسل المخ و هذا ما دلش على كونهم ساتانيك . و فما فيكرناس إلي اتهموه بحرق كنائس في النرويج ما أكدش كونو ساتانيك أما ضد الدين على خاطر الكنيسة قتلت جدودو واستعمرت السكنديلافيا وكيما قال أليس كوبر ساتانيزم ماتلقاهوش عند كمشة فروخ تتراقص في حفلة تلقى هالوين غادي "

قص أيمن الهدرة  : "ملخر فما حالات نادرة متاع ساتانيزم أما هو عمرو ما كان قايم على ساتانيزم ، نشالله اقتنعت "  

تلفت عمر يعاند : "أي هذا يدل على صحة كلامي ، سبحان الله تستعرفو إلي هو تبع الموساد والماسونية وتبعدوش على الباطل ؟ "

أيمن تنهد و تحسو باش يشلط : "شوف تقلي أورفاناد لاند تابعة الموساد نفهمك ، من إسرائيل و يبعثو ميساج نجم نفهمك أما ديو ولا دارك ترانكيليتي شمجيبهم ؟ وزيد الماسونية هي تنجم تحسبها خرافة كثرت الأساطير وأكثر وحدة لوجيك تقول إلي فما كمشة فلاسفة وسيوونتيفيك ضغطت عليهم الكنيسة وما خلاتهمش على راحتهم ياخي تخباو عند فرونك ماسون وسماو رواحهم أيلوميناتى وبعد مدة تقسمو على زوز جماعة تحب تكور بلكنيسة  وجماعة تحب تركش ما دور بحد وهذايا إلي تحكي فيه يتسمى ايفي بابيون (effet papillon) تبدا هدرة صغيرة تولي سخطة كبيرة إلي يحكي في هدرة يزيد يفوحها وحدو "

عمر قعد مكبش ، بالك الميتال نعتبرو حالة ملحالات إلي تقاسي منها المجتمعات ، بالك هي مازالت من أبرز المواضيع خاطر الكلام إلي في الغناء و الحضور الركحي و أهم حاجة إلي الميتال جا يهاجم في أبرز الحاجات إلي يكبش فيها المجتمع الدين و النظام ، نقصد بالنظام الخضوع الأعمى لقواعد . مثال صغير على الطاير في دزاير ما عندكش الحق تعمل جروب روك ... بش تقلي أسيل (acyl) عايشين في فرنسا ما تكسرش راسك . في تونس ماخذين فكرة أحنا همجين شعب ماخو أفكار مسلمة ما فركزش ... و هذي أكبر أزمة ينجم يواجهو مجتمع .

أنا قاعد مكرز و تليفون نوقز . نمرو السيد إلي نستنى فيه هزيت عليه: "وي هاني راكش ، تطلعش ما عرفتهاش ؟ "  

نسمع في ضحك : "هههههه لا لا هاني ، دخلت توا وينك ؟ "

بيبيتلو جا بحذايا : "أهلا مهدي سافا ؟"

جاوبتو : "واللهي لحمدللله ، كلمتني لبارح وقعدت متشوق ليا قرون ما برفتش   "

ضحك و كلي فرحان : "هاهاهاهاها باهي باترون نحنا جروب كوميرسيال نلعبو لينا عامين الباسيسة متاعنا طالع لألمانيا وحاشتنا بواحد في بلاسطو  "

أنا نفهم في الهدرة : "أي ..."

هو كمل : "باهي ، مانيش بش نسألك قداه ليك تلعب ولا لعبت قبل ولا اكا لوغة مادام حكالي عليك أسامة راو جوك فسفس  أما نحب نعرف عندك لوقت باش تبرف معانا 4 أيام في الجمعة و تلعب ليلتين و في الصيف عادي نلعبو كل يوم ؟  "

أنا نحكي كي واحد فصالة  : "يا ولدي نحن لها وراس لحنينة ما عندك كان الرجال تحبشي نلعبلك توا هيا   "

تبسم ومدلي ورقة فيها أسامي غنايات وفلاش : "باهي لفلاش باش تعرف ستيلنا بفف تنجم تحسبها بش تادابتي روحك عل جو        و ليستا هاذي حضرها تو نكلمك على البروفة ".

قعدت نقرا في أسامي الغنايات       

michael jackson smooth criminal

stevie wonder master blaster

system of a down aerials

pink floyd comfortably numb

pink floyd another brick in the wall

كي كملت شفت ليستا تحمست : "باهي نحن لها ، غنايات نشيخ عليهم  "

جاوبني : "6 زيت ، أما ستيفي ما تحقرهاش فما عباد تعدي بيها كارت برو وفيها قلبات زبي زبي "

خزرتلو  و تبسمت بكل  ثقة : "صاحبك راجل  ".

وأنا خارج جاتني كي التبربيشة ، علاش ما نكمبوزيوش ؟ مبعد تفكرت أنك في تونس مقبرة المواهب هوني  عندنا جماعة تلعب موسيقى و تتنفس موسيقى ، كي نقول تتنفس سي تتنفس أما مصيرهم في بار يغنيو خاطر بش تسجل تتكلف شحم يهود قداش عندنا مواهب مدفونة تحلم بفرصة ، فرصة بركة بش صوتها يوصل يشوف الضو أما وزارة الثقافة همها الوحيد ... بف ما عندها حتى هم تحب ترقد و تحكم على آلاف المواهب بل إعدام ردما و بعد نجيو ننذبو شبي أولادنا شادين القهاوي ؟ زعما يجي نهار و تتصلح العقلية هذي ؟ مورالتي دو ليستوار   ... وقتاش نوليو شرفة ؟ تحيا الثقافة في تونس   

  

            

previous> 

<next