أينشتاين سَلفي ؟

ليوم عديت نهار كامل في الدار ، هبط عليا البخل على عجلة ما عيني بش نعمل شي قاعد طالع هابط في الفايس بوك نتفرج في سيري و نلعب شوية موزيكا.ما تجيكمش أيامات كيفي ؟ تحب تشد الدار و ما ترى حتى مخلوق ؟ العزلة ! العزلة ! الحالة هاذي مااحلاها و ماخيبها في نفس الوقت ... عامين لتالي قعدت شهر مابعدتش على الحومة سميتو شهر النقاهة سميتو،  مخي رتاح أما توحشت البلادة إلي نسيب فيها و الريق البارد .    

في تنسنيساتي الفايسبوكية فقت إلي بضحك و لعب تعداو سنين ... زح كي خذيت الباك كاينو البارح وقتها نشطحو كي لمهبلة في الشارع تفكرت زادة النهار لوول إلي مشينا فيه للفاك نسخايلو بش تكون جنة أما كيما قالو ناس بكري تسخايلو موسى يجيك فرعون    ...  يا حسرة .  

تعدى نهار كامل  الحنين للماضي و الفشل إلي وصلتلو في حياتي ... قعدت نتخيل  نرجع عمري 3 سنين ونعاود نعيش حياتي بلكاباسيتي إلي عندي شيصير ؟    

أول حاجة نمشي ننتقم من معلمي الروضة ... ضيعولنا وقتنا بأكاذيب و سموم و أوهام ... الصيد يمشي يصطاد الغزالة و الغزالة تهرب و الصيد يقعد جيعان و قانون الغابة وين ؟في بلاصة نضيع وقتي نتعلم أغاني كيما "أنا الفتى النظيف" نعدي وقتي نتعلم في حاجات تصلح ، قداش تمنيت نكتب في إجابة على مسألة متاع الفلاح "الرجالة تكسب و الطحانة تحسب " حكاية الخير ينتصر ديما في الأخر قداش شبعنا بيها : العراق و أمريكيا ، فلسطين و إسرائيل ، داوود و جالوت ، موسى و فرعون و غيرهم و ما حكى حد على الأغلبية الصامتة ، ديما يجبروك بش تتفاعل مع واحد و تقمع الأخر و 5% مالشعب يوصلو يسمعو و يحلو و ينقدو بموضوعية و عقلانية . صحيح ينجمو يكونو غالطين أما هوما وصلو خزرو لحالة بموضوعية .  

كنت نجم نحلب على جماعة "أتفق أهل حيك على حملة نظافة صف الأجواء " كنت نقول إلي الحملة لازم تكون في المخ ، لازم تصير حملة فكرية . لازم الحملة تصير في العايلة مبعد أولاد الحومة و مبعد المجتمع الحكاية عمرها ما كانت لمد كواغة و طرف دهينا .الحكاية لازم يتعلم الصغير أنو الإنسان النظيف ، نظيف في كل بلاصة موش كان في الدار ، لازم يتعلم إلي التقطيع و التريش تضيع وقت و ما عندو وين يوصل كيفو كيف الدخان الشراب وأي نوع متاع إدمان ... لازمو يتعلم أنو الإنسان لازم تكون عندو كلمة و كلمتو سيف . لازم يتعلم يواجه و يقول لا خير ملي يعطي كلمة ما ينجمش ينفذها  

كنت نجم نتعدى نلعب كورة تخلص برشا فلوس و مبعد نستثمرهم و نرتاح نعدي حياتي الكلها نتعلم و نغتص في الكتبة ماعادش نخرج .  كنت نقول لعايلتي أنو أغبى شي هو أنك تعمل دار ، تبنيها و  تغصر روحك بلديون ما تعرش على الوقت شبش يخبيلك  

أما بعد هذا الكل ... زعما نلقى السعادة ؟

هذا من أكثر حالات البكاء على الاطلال ... بش نرجع لازم نفوت سرعة الضو حسب أينشتاين .

أنا راكش كلمني صنوع ما نعرش كان تتفكروه ... أني واي هزيت التليفون  : "ألو ! شكون معايا ؟"

جاوبني : "سلام عليكم مهدي ! صنوع معاك ، دبرت نومروك من عند لولاد ..."هو يحكي و أنا مستغرب من كلامو باهت نشالله خير ... الغريب في الأمر أحنا أصحاب أما علاقتنى بيه كان ريتك نفرح ، كان ما ريتكش عادي . جاوبت مبهم : "شتحب ؟ أه سوري دخلت بعضي أهلا سافا ؟"

ضحك و تكلم : "ههههههه ميسالش ! والله حبيت نطلب منك السماح على اخر مرة ماك تعرف الدين عند المؤمن أهم حاجة ، قلي ؟ نجم نشوفك توا مني نطلب منك السماح و منا نعملو قهوة ؟"

خزرت لبيتي و قعدت نخمم ، زعما نعدي نهار كامل هوني ما نرى حد ولا نخرج نكسر راسي معاه و نحكي في موضوع زوز مسكرين و كونتر بعضنا ؟

مهمهت شوية و بعد  : "ااااه هاني جاي "

وأنا خارج بدا الهلواس يلعب عليا ، تصور كان يطلع يكذب عليا و باش يقيم عليا الحد ، تصور كان ناوي يقتلني ؟ تصور كان يجيبلي أصحابو يتعرضونى ويهزوني من غادي لغادي ؟ لا أمبو ، صنوع أبعد مالشي هذا ، ما عندوش الهمجية هاذي . و شكون يعرف ؟ عندي  جيرانا مكان عاطيها فيه حد و مشاو لسوريا في قالب غدرا    

ملخوف ، قلت خنجي من ثنية أخرى ما تعرش على بلاها ، و نكلم أصحابي فماش ما يجيو و نحرقلو الفيلم ... كلمت هشام :

"زباب ، وينك ؟"

"مانيش في الدار ، بايت في الفاك "

تنهدت و جاوبتو : "باهي"

"هيا طير"

كلمت نادر : "وينك ؟"

نادر يبدا لاهي ولا يعمل في أي حاجة يقلك ديما : "راني مع زها حديد "

باهي قوس صغرن على زها حديد ، السيدة هاذي مل عباد إلي ناكولها أمها ، مهندسة عراقية خدمت في العالم الكل و هي مثال للمرا الحرة ، القوية ... نادر يطمح يكون كيفها وإلى خير منها و متأثر بيها و ماخوها كقدوة . نرجعو لحكايتنا ...     

حسيت وقتها إلي ساي بش نموت ، رغم إلي ديب أنسايد عارف إلي ما فماش منها الحكاية هاذي  

وصلت للقهوة نلقاه قاعد مع راجل شايب ، الزوز لابسين قمصان وحاطين كيسان تاي ، شكون إلي معاه ؟ تكبسة و دخلت بعضي و جيت بش نعمل دومي تور و نروح أما ساقي ثقلت شوية . إلي نخمم فيه يطلع صحيح زعما ؟ أما قهوة معبية دونك يخرى فيه

راني من بعيد و وقف بش نراه ، مشيت ،خطوات رزان كايني هازز هموم الدنيا الكل على أكتافي ،  وصلت سلمت عليهم و خزرت لصنوع خزرة تفهم منها نحب نحفر الأرض و نقتلك . في حالتي هذي ماغير ما نخبي إلي أنا شادد روحي و قاعد سو مي جارد (sous mes gardes) سألت ديراكة : "شكونو هذا ؟ مش متفاهمين نقعدو وحدنا ؟ "

الراجل هذاكا ضحك و لعب بلحيتو ، ضحكاتو غريبة و تستفز برشا ما نعرش علاش أما ماعادش نجم ملستراس قدم روحو وحدو : "أنا الشيخ عثمان تابع جماعة الدعوة و التبليغ ، يعني  تقول رانا نتناقشو ، نتناظرو أما في الأخر ما يفسد  شي للود قضية "

رتحت شوية ، نتفكر حكالي عليهم بابا ناس متربين يغلبو الناس بمنطقهم و عندهم أسلوب ممتاز و بلاغة وعلم نتفكر زادة فما واحد قسم الشيخ القلال منهم مات بعد الثورة ... يلا فرصة بش نحط إلي نعرفو عليهم تحت الاختبار    

تكلم صنوع يطلب في السماح عال فاسا إلي جابني بيها :"مهدي ! سامحني كيفاه جبتك ما نقصدش أما تعرفني مع الدين ما نفهم شي . أنتي صاحبي و من واجبي كصاحب و كمسلم نحكي معاك و مبعد أعمل إلي تحب"

تكلم الشيخ : "مهدي نجم نتعرف عليك ؟ شتعمل في حياتك ؟ شتقرى كتبة ؟ "

جاوبتو :"نقرا علم نفس و نقرا كل شي على عجلة  "

بدا يحكي بكل ثقة  "تحسك ماكش مرتاح جملة ، باهي شنوا إلي مقلقك في الدين ؟ كان أقنعتني توا نبطل كل شي "  

خزراتو ، تبسيمتو .... اااااااااااااااااااااع كل شي فيه يستفزني ما نجمش  أفكاري : "باهي المشكلة في إلي يوعض تتخمر معاه تبكي ومبعد تبرد ما صار شي تقعد نهارين شادد الريجلة ومبعد باااااااااااااااااام كاينو ما صار شي . عندي مشكلتي مع كذب رجال الدين و إفتراءهم على الناس ... مشكلتي مع السنة إلي هي فيها برشا غلط و برشا تضيع  "

ضحك و قالي : "هههههه  كهو ؟ باهي كي ما عندكش مشكلة مع القرآن و شنوا مشكلتك مع رجال الدين ؟"

خذاتني شنعة و أنا نحكي ، قلت بالك كي نسخن نجم ناخو الهف عليه : "تصور أنتي يسخايلو رواحهم عندهم مفاتح الجنة ، السيد يقلك راو إلي تعمل فيه الكل غالط ديما تعيش مكشبر عندك نهارين في العام تفرح فيهم العيد الصغير و العيد الكبير الباقي الكل كشطة و اربط ، تبدا تحكي معاه يقلك ما تحكيش في الدين خلي أهل الاختصاص لاختصاص و يعطيها كعبة الإسلام في خطر ومبعد ما يفهمش في المتال و يقلك عليهم عبدة شياطين ، دز الميتال السيد هذا يجي يتمنيك على المسيحين و البوذين و يسخسخهم و مبعد يقلك الحمد للله على نعمة الإسلام و كي يجي واحد يمس الإسلام يتخمر  و هو يبدا يدعو لدينو و في نفس الوقت يحب يرفع قضية و يسكر الشانات الأخرى و غيرهم مل اللقطات الغريبة و تحبني بحترم ناس كيما هكا  ؟ "

ضحك و قالي : "نجيبلك دبووزا ماء ؟ "   

كمل هو : "و نعرف ربي ميزنا بعقل و هو قالك ما تخممش و قالك المرا ما تخدمش و قالك نخرجو نعملو غزوات و إسرائيل و أمريكيا عندها أسلحة و أحنا على حصنية ، هكا ماهو ؟  "

خزرت و دخلت بعضي السيد هذا يعرف يحكي و يستفزني ما فهمتش كيفاه نحكي معاه دخلني بعضي بصفة كبيرة تحسو عارف شنوا يدور في مخي كايني كتاب قدامو و عارف خطواتي الكل ، نبدل التكتيك ؟ ولا نكمل في إلي نعمل فيه ؟ فاك ماني عارف شي

تكلم الشيخ يدافع على أصدقاؤ مام سي عارف إلي كلامي صحيح : "أنتي كي واحد يسبلك أمك رغم إلي هي غالطة ماك تهيج و تتخمر و تتحول ، هوني نفس الحالة و نجم نقلك أكثر فما فرق بين الحب و التقديس ، زايد نقلك اناهي الأعلى درجة . تي  الكورة كي واحد جمعيتو تخسر تلقاه يدز بلي  ينجم . شوف ، الإسلام  جزء من هويتك ، كيما فما برشا يقولو نحنا أمازيغ مناش عرب . أما تحب ولا تكره العرب جاو لتونس و ولات تحت سلطة العرب . هاذي ما تنجمش تلعب عليها هاذي فاكت هههههه نجم نحكي كيفك ماو ؟  "

في العادة كي نبدا نتناقش مع واحد تلقاني عامل نمووسة نحكي و شايخ أما الشيخ عثمان تحسو يمشي بمنطقي مبعد يكنترني ... يستفزني عالاخر  .

تكلمت أنا : "تي بلاهي غرام لوجيك ما عندوش ويحكي ويحل فمو ؟ توا هو يتمنيكلك على الديانات الأخرى الكل ، عبدة الصليب ، عبدة الأبقار ... مبعد واحد يحكي بلخايب في الإسلام تاكل بعضها كيما فرنسا و الدنمارك ، كلات بعضها و كان مات واحد راو ما صار شي كيما صاير في فلسطين كل يوم سوريا عراق ...   "

تبسم و جاوبني : "باهي ، فما زوز أنواع متاع خطاب الأول متاع توعيض إلي الناس مستانسة تسمعو في الخطب والدعوة و نحكيو على عباد نجحو في حياتهم وإلا خدم الدين و هذا يحمس الناس برشا و فيسع ما يوفى المفعول متاعو و فما إلي تستعملو أنتي توا و هو تعتمد على وقائع و حجج و هو إلي صعيب استعمال الخطاب الدعوي معاهم أما لازم تحاورو بخطاب علمي بحت  "

باهي  لآن ما فهمتش معايا ولا معاهم ولا كيفاه يخمم ، كملت حكيت معاه : "توا بربي سامحني ، واحد يحكي على كل ماهو لبس ، حلال حرام ، كل ماهو عندو دخل بلمظاهر و نساو إلي الأخلاق أهم مل منظر "

الحجج متاعو كي العادة ماهمش قوين أما عندو قوة بلاغة و فصاحة قوية : "باهي نرجعو و نركزو على المخ : المخ يكبتى إلي يحب يكبتيه و يتلف الباقي نعطيك تجرب التصويره كل واحد و كيفاه يشوفها ، هوني المخ يكبتى كان الحاجة الخايبة ، بخلاف بنو فايسبوك فرحو بيهم على قاعدة شوف شخرج . ندبر عليك ؟ برا أمشي لخطبة جمعة و كان يقلك حاجة حلال ولا حرام بلختار . وقتاش يحكي عليهم كي يقرب رمضان ولا العيد . تلقاه الإمام النظافة من الإيمان ... أخرج للشارع . أختاه الحجاب ... الشي على برا . أخي الشراب والدخان مضر ... الحمدالله ما سمعوهش ولا البلاد راي في حيط . هههههه "

ضحكت على كلمتو لأخرانية . الشيخ عثمان حكى مع برشا كيفي تحسو ينجم يكون هذا إلي خلاه عندو ديما ما يجاوبني و عندو قدرة على معرفة إلي يدور في مخي .

حبيت نزيد نطلع معاه في الموضوع نشوفو  شيحكي على السنة كيفاه نقول إلي هي محرفة :

"شيخ توا فسرلي ، شبي يقولو إلي كان المسلمين بش يدخلو الجنة كان بش نفسرلك بلمات حظوظك ضعيفة برشا "

ضحك كي العادة بطريقة مستفزة متاعو و قالي : "دليلك ملك ولاة ؟ كيفاه الحظوظ ضعيفة ؟ "

بديت نحكي : "توا في العالم فما 7 مليار بشر ، منهم مليار مسلمين ..." قص عليا و قال :"مليار هههههه عرفتها دليلك ملك هههه سامحني كمل كمل"

كملت :"باهي عندك حظ على سبعة باش تدخل لجنة مل سبع هذاكا لازمك تكون في النص الصحيح إلي هو السنة بطبيعة توا لازمك تكون حظوظك واحد على أربعطاش . مبعد نمشيو لاكا الحديث السمح قالك 72 فرقة الكل في النار كان وحدة بركة هذا رحمان و رحيم ؟ هذا غفور ؟ هذا خلق الناس باش يدخلهم الجنة ؟ عادة لكلنا في النار علاش هكا ؟ حاجة ملثنين يا ربي يكذب ولا الحديث غالط   "

لعب بلحيتو و لمرة هاذي ما ضحكش كيما العادة وقعد متفاجئ و مبعد قعد يربح في الوقت شوية : "الحاجة إلي عجبتني فيك ، تعرف تحلل تعرف تخمم عندك قدرة على التحليل ... باهي الحديث صحيح على خاطر ينجم يدخل العبد لنار و مبعد الجنة يشفع فيه سيدنا النبي عليه صلاة و السلام "   

كملت في نفس الموضوع : "تي حتى الشفاعة ما نمنش بيها ، توا تخيل انتي نبي أمنت بيه و بمعجزتو مبعد يقلك نفسي نفسي ؟ ما دخلتش لمخي ، تمشي لآدم و أدم يبعثك لنوح و نوح لعيسى ... و لا سيدنا محمد باش يمنع 3000 واحد بركة ؟ تي نحنا مليار أحسب لمليار على قداش من  جيل  "

حسيتو أكلي تقلق شوية و حاول يحافظ على نفس نمط الكلام :"لا لا وليت تلبز هوني ، السنة لباس عليها جاية تكمل الدين و توضحو أستغفر مولاك "

كيفاه تبدل المنطق مستانس مسرح ؟ زعما نلقى الهف ونضرب ضربتي شنعة و فرشت كوارتي الكل : "يا شيخ ، برشا مغالطات جاية ملسنة عذاب القبر مثال كيفاه يتعاقب عبد قبل ما يتحاسب ؟ المسيح الدجال ، حذرنا ربي مل تعلق بأولادنا و ما نمشيوش نجاهدو ، حذرنا من حاجات صغار ... كادو  يقلك هذا في القرأن ؟ و ربي قالك الساعة تجي بغتة على حسب هكا يجي المسيح مبعد حط 42 سنة و توفى الدنيا و زيد بن خلدون فسر كيفاه ما فماش مهدي منتظر . نزيدك حكايات ما أتعس سيدنا عيسى قالو قبل ما يترفع  يموت حب وحدة اسمها مريم و هي حبلت منو و جابت طفلة اسمها سارة . علاش نحنا نجزمو قطعا وجود الحكاية هاذي ؟ و زيد فما الاسلام يخاطب العقل البشري و صالح لكل زمان و مكان ... الإسلام حاجة براغماتية أعمل الخير باش تاخو الجنة و قالك صالح لكل زمان و مكان كيفاه بكري لازم 4 شهود على حكاية توا لازم كاميرا تقضي  "  

سكت الشيخ ، فرحت ، نسخايل روحي أقنعتو ، وليت نتخيل إلي أنا رديت مسلم متدين ملحد وخرت عل كرسي و تكيت ظهري . سألني الشيخ : "صنوع حكالي إلي أنتي مغروم بأينشتاين ، صحيح ؟ "حركت راسي معناها أي .      

تبسم و بدا يحكي معايا : "باهي ولدي ، مالا تعرف إلي الزمن ماهوش ستابل بمعنى كي تختلف الجاذبة يختلف الوقت يعني كي الكون بدا ، بدا الوقت مضغوط بصيفة رهيبة على خاطر الجاذبية قوية لدرجة ما تتخيلهاش و حتى حد ما يتخيلها . باهي نزيدك حسب كلامو و حسب نظريتو أكد إلي ربي كي خلق الكون في 6 أيام النهار لول الوقت موش كيما النهار الثاني موش كيف النهار الثالث  " سكت مص ريقو شوية و كمل  "باهي النهار لوول دام 8000 مليون عام خلق فيه كان الضو ، باهي تصور أنتي قداش فما مادة متركزة في بلاصة وحدة و تخيل الجاذبية غادي ، النهار الثاني خلق الماء و التراب هوني نقص تركيز المادة ، دام النهار 4000 مليون عام ، مبعد خلق الكواكب و الشمس دام 2000 مليون عام و هاك تلاحظ كل ما تبعد المداة تنقص الجاذبية و ينقص إلي نسميوه اليوم ، النهار الرابع دام 1000 مليون عام و ركح فيه المولى عز و جل الكواكب و صففهم ، النهار الخامس دام 500 مليون عام خلق فيه الكائنات الحية و النهار الأخر جا فيه سيدنا أدم عليه السلام أحسب قداش دام . باهي هوني دليل على أنو ربي عندو الزمان و المكان و كان تثبت تلقى عندو معنى كي يقلك يوم القيامة 50000 سنة مما تعدون . نزيدك زيادة كي توصل لسرعة الضو شمعنها  ؟    "

جاوبتو : "الخلود ، تولي ما عندكش ماس يعني تولي الثانية عندك موش كيما الثانية عندنا ... " قعدت باهت اخر حاجة كنت نتوقعها واحد يحكي معايا بحكاية متاع فيزيك كنت نتوقع حديث ، أية موش فاهمها ولا فاهمها بلغالط أما فيزيك ؟ يا راجل ! ملقيت ما نقول  "فما بابا شد الفاتيكان كي خارج قال راو كان فما ربي هاني سلكتها كان لا ما خسرت شي ، يعني هو بيدو شاكك "  

الراجل سكت شوية ، قعد يخمم و مبعد قالي : "ولدي تصور أنتي في الفيزيك كونتيك يلقاو إلي البارتيكول تنجم تلقاها مرتين نفسها في بلاسطين و كي تركز معاها وحدة منهم تتنحى ، شقولك في حكاية الفراغ موش فارغ فيه طاقة ؟ هاذم الكل حاجات كان بش يوريوك راو بش يوريوك قوت ربي ، كان بش تلقى غلطة صغيرة مع القرأن توا نحجم لحيتي و مل بار ماعادش نخرج ، أنا منحبكش تمن بعلمات الساعة ، أما نحبك تشوف هكا إلي عمل هذا الكل يكيدو بش يعملك مسيح دجال و طرف حاجات أخرى ؟ بالك العلم مافاقش وإلى ما عرفش أما هذا ما يعنيش إلي هو ما فماش . "

السيد سكتني ، قضى عليا ما بدليش فكرتي أما خلاني نخمم و نهلوس و نحسب فيها و نعمل فيهم الكل ، الشيخ مشى أما كلامو مزال يردد سنفونيات في وذني ، عبد دار بيا عبث بيا إنسان يتقدر ، على علمو على منطقو على لهجتو ... أثر فيا طول و عرض و ارتفاع ...    

    

        

previous> 

<next