الفاك حشاك

لبارح كلمني بروفي يحب يتقابل معايا في الفاك عندو ما يتناقش معايا فيما يخص الميموار ...إلي عدا مرحلة الميموار ولا ستاج يعرف العذاب بش توصل تحكي مع بروف و تحصرو . ربي يستر . ثنية كاملة وأنا نخمم زعما مشيش يطلعلي بطلعة ما عجبني شي عاود زك أم الخدمة ملأول . مشيش يقلي المراجع متاعك ناقصين  زيدو مازال يتنفس. ما تستغرب شيء .

دخلت للفاك ، دار لقمان على حالها، كيما خليتها . مانيش مستغرب شي جامعة عامة ، الإهمال عنوانها و تحظير جيل فعال و متكون من اخر اهتماماتها .  على اليسار جماعة أوجات (UGET) واحد يعيط .عندي صاحبي قاري ريزو ديما يقول مع إصدار ميثاق شرف بش إلي يدخل معاهم ما يمشيش لجامعة خاصة ، تلقاه يعيط جامعة شعبية مبعد أول ما ينجح يمشي يعمل هندسة بلفلوس . لحاسيلو السيد يعيط و ريقو شايح أما مش وقتك جملة بش نعرف شفما ، كان فما كارثة راو سمعنا على الفايسبوك ولا راديو . على اليمين نلقى عرص البوفات (buvette)كي العادة 100حب و 90 سباطا خدامة .  مولاها مرة حط ورقة ممنوع لعب الورق صورولو صبع الوسط تحت كلامو و مرة فقنا بيه ما يعرش جاك دانيال كلمناه يجيبلنا منو على أساس نوع متاع جو(jus) .

دخلت للمكتبة ، البلاصا الوحيدة إلي ما عندي معاها حتى ذكرى ، كان بش ندخل غادي راو على ويفي ولا فما شكون جاني و ما يعرفش الفاك ، المكتبة أوضح حاجة  . ما فما حد نعرفو و مزالي نص ساعة على رنديفويا مع البروف .

ما لقيت حد ، قلت علاش ما نقعدش نشوف فماش حاجة ناقصة نسية ما قديتهاش . حليت البيسي ، جبدت الرابور و بديت نثبت . أنا هكاعلى عصابي ويزيد يخلط  العرق ختمت يا بن عروس ، نسمع في واحد يعيط : "وينك يا هراب ملي خرجت مموار ما طليتش؟" خزرت  جيهة الحس نلقى أيمن . الطفل هذا عرفتو أول واحد ، داخل نتبهلل ماني فاهم منها شي ياخي هو تنجمو تقولو حطني في السكة بش ستانسة وعرفت عباد و رميت الصحبة على برشا مخلوقات تجمعني بيهم أحلى و أثمن العلاقات المصالحية التشاركية الانتهازية  و ولينا أصحاب .  قمت و عيطت  : "أيمن أيمن ! والله كنت بش نطلبك مبعد عندي رنديفو مع الأنكادروور، نكمل هل وحلة و بعد نتفاظالك . " دوح راسو و جاوبني بتقوحيب : "أش تحشي فيه ، قول راك نسيتنا و كاهو ، شعامل مالا ؟ شفما جديد ؟"

ضحكت خاطر حاسس حياتو هوا فيها جديد أكثر مني  : "لا ! احكيلي أنتي شفما جديد و شنوا اخر الأخبار في الفاك "

جبد كرسي ، قعد و بدا يحكي  : "يا زبي يا زبي ! فاتك صيفة عرض ، صيفة عرض ما عندك حتى فكرة "

بديت نتبع في الهدرة : "ههههههه كيفاه ؟"

قرب وجهو و حاول يحكي و ما يضحكش    : "أكا الكوبل روميو و جوليات مايد أن جبر عملو عركة و روميو ناك طريحة  "

تصدمت ، قعدت مبهم شوية و قتلو : "نو واي ! نو فاكينج واي ! كيفاه يا زبي ؟ أنا نخرج و تتناك أمها الفاك ؟"

كمل أيمن هدرتو : "هههههه يا مهدوش يا مهدوش والله ليك وحشة ، هيا ملا شد عندك : سي روميو مشا للحمامات ، سكر و بعث تصويرة زبو لجوليات و يعمللها كي ما تحبنيش نسد نقبتك هاني بش نحطو في بلاصة أخرى  "

طرشقة ضحك و نعيط : "هكا ؟   ههههه وعلا الزبي أوه ! أي وهي شعملت ؟   "  

أيمن حك يديه و قال : "جاتو قدام صحابو و شنعت بدات تعيط ، هوا  بلاسط ما يسلها ولا يقول راني سكران تاخوش عليا شنع و ولا صاحب حق . تركبها الهبلة دور و طعتيه كف مبعد بساكها في  وجهو ، ديجا خشمو تكسر . هو مرهوج و تزيدو على كرارزو مسكين ما زادش  "  

ضحكت و قلت متحمس : "هههههه ما أحلاها فيه ، زب كي مشيت أنا شنعت . فما حكاية أخرى ؟ "

بدا  يحكي : "تتفكر أكا البروف إلي عصو رزين ؟  "

بهمت خاطر البروفات الكل عندهم نفس الخاصية : "اااااااااااااااااااا  زيد وضحلى "

متحمس بش يحكي ديراكة دخل في صلب الموضوع : "أكا الحيوان إلي يحكي نكتة و يضحك عليها وحدو . فما كلاس حطولو أكا الفاذا متاع دا بوم تس هوا يقول نكتة و التليفون يخدم  وهوا مش معدل "

تكلمت : "الزح السيد هذاكا مسكين ، عايش بين الكتبة تصور أنتي عقبووها  عليه جماعة مازالو يقراو .بش تفهم قداش نو لايف بش نحكيلك على واحد كيف السيد هذا ... فما بروف كان عايش في أمريكيا ، قرى عندو  هشام ، أكا  الطفل إلي ركش معانا مقابل محطة المترو ، حاسيلو السيد هذا مريض بلسمنة يجيهم لابس حوايج كيما متاع هواي قميص بلنوار و شلاكة بو صبع ، قردوه أما ما خرجهم يطيرو كان هوا .عوجهم في النوتات ، قاللهم راو إلي يخزر لمظاهر ما تعداش مرحلة الحيوان بستيلو بطبيعة كل ضحكة عليه خرجت ثاني و مثلث ، أفهم وحدك ... "

تقلب شوية الجو ، جاوبني : "عندك الحق ، نحنا شعب خرينا فيه بلمظاهر ."

سكتنا شوية بعد حب يرجع الجو كيما قبل: " فما نكتة سمعتها الصباح لتوا كي نتفكرها نشيخ ضحك ، قالك فما راجل خذا مكينة تدخل البهيم حي تخرجو مرقاز ، هي إلي تذبح تسلخ تعمل كل شي . تلفت ولدو قالو بابا بابا ! فما مكينة تدخل مرقاز تخرج بهيم ؟ قالو بوه أي أمك ."

ضحكت على سبيل المجاملة و خزرت لتليفون و قمت :"ديزولي فرار ، لازم نمشي ، وقيت على البروف . "

مشيت لسال نلقى طفلة مدينة و بحذاها واحد كي تراه تقول نورد (nerd) .

بش نحكيلكم على بروفي شوية إنسان ماخو سمعة ضارب برشا : مرة فاق بزوز أولاد يتفرجو في بورنو في الكلاس قاللهم شوفو درا شكون عندها زعكة  تنيك في الراس . مرة تعارك مع المدير فشلو عجالي كرهبتو و حطلو ورقة "هذا الشخص ميبون الرجاء النكاح بشدة ."

كان يقول إلي هو يفضل أنو الناس تعرف إلي أنتي تعمل المستحيل و ما تاقف قدام حتى شي خير من أنو يعرفوك بمنظر الإنسان الحظاري و السيفيليزي  وعندو مقولة ديما يعاودها : "un peu d'Anarchie ne fait pas de mal "  

نلقاو لبروف في سال دخلنا نحنا التلاتة فرد وقت : "مرحبا بيكم الكل ، باهي قبل ما نحكيو على بروجياتكم بش نحسبكم زملاء و ناخو مل إكسبرتيز متاعكم . شاب 28 سنة جاني مل نورو فمو تعوج شنوا الحاجات الأولى إلي تجي لمخاخكم ؟  "

المدينة : "نقلو إلي الزين زين دخلاني و نحاول نعمل معاه تيرابى تخليه يستانس بحالتو الحالية  "

البروف عمل رياكسيون غريبة : "هههههه مناش في تنمية بشرية هوني ، مهدي ... "

سكت شوية و بعد حبيت نتفلسف : "مشكلتو مع البنات "

البروف ضحك ضحكة متاع تقوحيب و بعد تكلم : "بعيد على الإجابة أما تكلم نحب نفهمك أفحمنا  "

دخلت بعضي شويا : "باهي الجانب الحيواني ظهر بصيفة كبيرة ، هوا تلقاه ما عندوش زهر مع البنات و زيد الغرائز متاعو دخلو في الخط دونك ..."    

لبروف مازال يستفز فيا بضحكاتو : "دونك شنوا ؟"

ضحكت ضحكة متاع تبهليل متاع يا معلم أفهم : "فما شكون يقول إلي الجنس مهم ينجم يوصل يقول إلي هوا كيما المأكلة ، دونك إيماجين شكون يقعد ناقص ماكلة شيصير ؟ "

لبروف قعد يميل في راسو يمين و يسار و بعد جاوبني : "موووش غالط ... أما بعيد برشا على المطلوب كان جيت في تاست راك ماخو 3 على 20 ، صحيح الجنس لعب دور أما ماهوش العنصر المهم و ماهوش الوحيد عبارة بشتشوف في جايم أوف ثرون كان أريا و لخرين لكل حكاية موش مهمة  …  ليبعدو ... "

الأخير : "جاتو شوك ولا تغشش ، بدنو ما قاومش و عمل رياكسيون مل نوع هذا   "

البروف : "ما تسكتش ! أعطيني اناليز كاملة ، تكلم ! "

الطفل ركح مرياتوو و بدا يتكلم : " باهي أنا نرى إلي جاتو كريز متاع 25 مخر شوية ، حياتو من فشل لأفشل زيد كي أكدت لمهدي إلي الجنس موجود نتصور إلي هو فشل عاطفيا ولا ماهوش خالط يعرس أصلا  "

بروف عمل ببدنو لقطة كاينو يتفرج في ماتش و إيكيبتو ضيعت بينالتي : "لاااااا مشيت بلباهي و رجعت للجنس مرة أخرى لاااااا الزح ، أنتي ! أما تحكيليش على التنمية البشرية . "

المدينة : "المشكلة إلي عندو تلها بالحياة الدنيا ! يخمم بش يوصل يعمل حاجة في حياتو أما ما وصلش ، في بلاصت يحمد المولى عز و جل تغشش و طارتلو ياخي صار إلي صار"

البروف : "باهي إيجابتك فيها الصحيح إلي هو غش و فشل و إحباط ، متفاهمين فيها الناس الكل ، في بلاسط تبربش غادي المشاكل إلي خلاتو تعمل غادي مشيت تلوج في حل . الإنسان بصفة عامة مايعرش روحو شنوا ، ماهوش فاهم شي و أمان عيش بنتي ما وصل دخل شاف بسي كان ما تلف الدين كان عينو راو مشى لجامع ، تنجم تحكي على الدين ، تنجم ترتحو بكلمتين أما بش تبازي على الدين لا . "

حسيتها كرزت و من عينيها تفهم إلي هي تحب تهز روحها و تخرج أما صبعها تحت الزرسة . بروفنا كي تشوفو كيفاه يكره المدينين عبارة ملحد قدامك تشوفو قدام ملحدين يوقفلك مخك ، شنوا يدور في مخو ، شنوا دينو ؟ الله أعلم .      

خذيت أنا الكلمة : "تنجم تكون الدنيا في مخو حاجة و في الحقيقة حاجة ، في مخو لا في أون روز (la vie en rose) و لحقيقة هي كرابستان ،تخرج يسخايل الدنيا بش تضحكلو و الناس أمان إيجا أخدم عندنا ما صارش جاه إحباط . قدم في الحاكم ولا الجيش طاح على حاجة . براف البيبان الكل مسكرة في وجهو . كمل الدنيا شعل فيها النار كل شي زاد غلا جات حلق . "

البروف تبسم حاجة فيها نوع مل رضاء : "لمرة هاذي 10 و نزيدك زوز على كرابستان ، هههههه عجبتني ، يظهرلي ساهلة توا هي ليبعدو "

قال : "باهي 28 سنة راو يشوف في كوارجيا أندادو وصلو و غوصو في الفلوس و هو مازال ياخو في مصروفو من عند دارهم ، أمو و بوه تلقاهم : شوف فلان و شوف فلان في بلاسط يقولولو أتو يفرجها ربي كثرو على همو  "

قص عليه لبروف و كلم المدينة : "شفت ؟ هاو استعمل الدين هوني و في بلاصتوو ، مانيش كونتر، أما كونتر تعملو كي الملح ما يغيب على طعام . "

كمل السيد كلامو : "تلقاه  زادة جاتو فرصة أما ما كبشش فيها . الندم ينجم يلعب دورو "

البروف : "هممممممم ، باهي ما غير ما تشوفو الحالة و تقابلوها عندكم فكرة عليها ، جبتكم ليوم حبيت نعلمكم كي تشوفو مريض قدامكم قبل ما تسمعوه ، تبداو تخمو شبيه ؟ تعمل مجموعة من الاحتمالات الإنسان ديما يكذب ! ديما يلبس في ماسكوات بش يخبي حقيقتو موش ملناس أما من روحو   "

سكت و قعد يخزرلنا ، قعد مركز في عينينا مبعد ترجع يحكي  : "ما تخممش في حل قبل ما تعرف المشكلة الصحيحة ، تنجم تفرهدو أما ما تبريهوش .مهدي تعلم كبر نظرتك و ماكش ساكسولج(sexologue)بش تربط كل شي ب... تعرف. باهي أنتي عاد شخت بلهندي لمقشر هههه هوما ياكلو فيالكلاة وانتي هاك مسلكها المرة الجاية نبدا بيك . توا اخرجو كل مرة واحد يدخل نحكي معاه على خدمتو    "

ملخص إلي فهمتو : واحد جاتو كريز 25 روتار ما نجمش يتحمل عمل رياكسيون على بدنو . صعيب تهرب مل كريز متاع 25 خاطر مناش كيفكيف ، إيزي . كل إنسان عندو هدف ، عندو نظرة للحياة تختلف 180 درجة على أقرب الناس ليه ، مكش مصدق ؟ شوف أعز أصحابك و أقربهم ليك أتو تلقى عندكم برشا اختلافات . المجتمعات المحلاها جات حطت ليميت للمخ و ماخلاتوش يحلم حلمة كبيرة أقصى حلمة ينجم يوصللها هي يعمل سيكل حياة معروف  ياخو ديبلوم قوي دكتوراه ولا إنجينيور يتعدى لشريكة تلقاه ريقو شايح يتشعبط و يعمل كاريار من موظف لكادر شاف سرفيس ... و إجتماعيا كانو راجل   يعرس بوحدة ماضيها باهي و كاني مرى تلقى ... شخص باهي يهنيها و يسترها . ماكش مصدق ؟ برا حط أفلام دراما تو تشوف بعينيك .     

      

    

 

previous> 

<next